امن کا سورج طلوع، امریکا ایران معاہدہ طے، پاکستان امن تقریب کی میزبانی کرے گا: وزیراعظم شہباز شریف

(اسلام آباد) وزیراعظم شہباز شریف نے کہا ہے کہ آج دنیا نے امن کا ایک تاریخی سنگ میل عبور کیا ہے اور جنگ کی طویل رات کے بعد امن کا سورج طلوع ہو گیا ہے۔ ان کے مطابق امریکا اور ایران نے تمام محاذوں پر فوجی کارروائیوں کے خاتمے کا اعلان کر دیا ہے، جبکہ دونوں ممالک کے درمیان ہونے والے تاریخی امن معاہدے کی تقریب 19 جون کو جنیوا میں منعقد ہوگی، جس کی میزبانی پاکستان کرے گا۔

قومی اسمبلی کے اجلاس سے خطاب کرتے ہوئے وزیراعظم نے کہا کہ وہ اللہ تعالیٰ کا شکر ادا کرتے ہیں کہ دنیا ایک بڑے تصادم سے بچ گئی۔ انہوں نے پاکستانی عوام اور عالمی برادری کو اس پیش رفت پر مبارکباد پیش کرتے ہوئے سابق وزیراعظم نواز شریف، صدر آصف علی زرداری، بلاول بھٹو زرداری اور دیگر قومی رہنماؤں کی خدمات کو سراہا۔

وزیراعظم شہباز شریف نے امریکی صدر، ایرانی سپریم لیڈر اور ایرانی صدر ڈاکٹر مسعود پزشکیان کو بھی امن عمل کی کامیابی پر مبارکباد پیش کی۔ انہوں نے قطر کے امیر، سعودی ولی عہد، ترک صدر اور چین کی قیادت کا خصوصی شکریہ ادا کرتے ہوئے کہا کہ ان ممالک کے تعاون سے امن عمل کو آگے بڑھانے میں مدد ملی۔

وزیراعظم نے کہا کہ فیلڈ مارشل عاصم منیر نے جنگ کے شعلے بجھانے اور مذاکرات کو کامیاب بنانے کے لیے شب و روز انتھک محنت کی۔ ان کے بقول مذاکرات کے دوران کئی نشیب و فراز آئے، لیکن فیلڈ مارشل نے ثابت قدمی کا مظاہرہ کیا اور ان کی کوششوں کے نتیجے میں جنگ بندی ممکن ہوئی۔

انہوں نے نائب وزیراعظم و وزیر خارجہ اسحاق ڈار کی خدمات کو بھی خراج تحسین پیش کرتے ہوئے کہا کہ انہوں نے امن عمل کی کامیابی کے لیے بھرپور سفارتی کردار ادا کیا۔ وزیراعظم نے پاکستان میں تعینات ایرانی سفیر رضا امیر مقدم کی کاوشوں کو بھی سراہا۔

اپنے خطاب میں وزیراعظم نے کہا کہ خطے میں کشیدگی اور جنگی صورتحال کے باعث پاکستان کی معیشت پر بھی بے پناہ دباؤ آیا، تاہم حکومت نے عوام کو ممکنہ مہنگائی سے بچانے کے لیے ہر ممکن اقدامات کیے۔ انہوں نے یقین دلایا کہ عالمی معاشی حالات میں بہتری کے مثبت اثرات جلد عوام تک پہنچائے جائیں گے اور حکومت معاشی استحکام کے ثمرات عوام کو منتقل کرنے کے لیے پرعزم ہے۔