ٹرمپ کا لبنان میں 10 روزہ جنگ بندی کا اعلان، اسرائیل اور لبنان کا اتفاق

(واشنگٹن) ڈونلڈ ٹرمپ نے لبنان میں 10 روزہ جنگ بندی کا اعلان کرتے ہوئے کہا ہے کہ اسرائیل اور لبنان نے امن کیلئے عارضی جنگ بندی پر اتفاق کر لیا ہے۔

امریکی صدر ڈونلڈ ٹرمپ نے سوشل میڈیا پر بیان میں کہا کہ انہوں نے جوزف عون اور بنیامین نیتن یاہو کے ساتھ انتہائی مثبت اور شاندار گفتگو کی ہے۔

ٹرمپ کے مطابق دونوں رہنماؤں نے اپنے ممالک کے درمیان امن کے حصول کے لیے 10 روزہ جنگ بندی پر اتفاق کیا ہے، جو منگل کو امریکی مشرقی وقت کے مطابق شام 5 بجے سے نافذ ہوگی۔

امریکی صدر نے بتایا کہ منگل کے روز واشنگٹن ڈی سی میں اسرائیل اور لبنان کے نمائندوں کی 34 سال بعد پہلی ملاقات ہوئی، جس میں مارکو روبیو بھی شریک تھے۔

ٹرمپ نے کہا کہ انہوں نے جے ڈی وینس، وزیر خارجہ مارکو روبیو اور چیئرمین جوائنٹ چیفس آف اسٹاف ڈین کین کو ہدایت دی ہے کہ وہ اسرائیل اور لبنان کے ساتھ مل کر دیرپا امن کے لیے کام کریں۔

امریکی صدر نے مزید کہا کہ وہ دنیا بھر میں 9 جنگوں کے خاتمے میں کردار ادا کر چکے ہیں اور لبنان میں جنگ بندی ان کی دسویں امن کوشش ہے، جسے وہ مکمل کرنے کے خواہشمند ہیں۔