اگلے ہفتے ایران کے ساتھ معاہدے کی امید، جنگ بندی میں توسیع اور آبنائے ہرمز کھولنے کا امکان: ٹرمپ

(واشنگٹن) امریکی صدر ڈونلڈ ٹرمپ نے کہا ہے کہ ان کے خیال میں آئندہ ایک ہفتے کے دوران ایران کے ساتھ ایک اہم معاہدہ طے پا سکتا ہے، جس کے نتیجے میں جنگ بندی میں توسیع اور آبنائے ہرمز کو بحری آمدورفت کے لیے دوبارہ کھول دیا جائے گا۔

امریکی نشریاتی ادارے اے بی سی نیوز کو دیے گئے ایک انٹرویو میں ڈونلڈ ٹرمپ نے کہا کہ ایران کے ساتھ مذاکرات تیزی سے آگے بڑھ رہے ہیں اور انہیں تہران کی جانب سے پیغامات کی عارضی معطلی پر کوئی تشویش نہیں۔

انہوں نے واضح کیا کہ پیغامات کی معطلی کا یہ مطلب نہیں کہ امریکا دوبارہ فوجی کارروائیوں کا آغاز کرے گا۔ ان کا کہنا تھا کہ واشنگٹن سفارتی راستے کو ترجیح دے رہا ہے اور معاہدے کے امکانات روشن ہیں۔

امریکی صدر نے مزید کہا کہ امریکا ایران کی بحری ناکا بندی برقرار رکھے گا اور اس وقت تک انتظار کرے گا جب تک تہران واشنگٹن کی قابلِ قبول شرائط کے تحت کسی معاہدے پر آمادہ نہیں ہو جاتا۔

ٹرمپ کے مطابق ممکنہ معاہدے کے تحت جنگ بندی میں توسیع کی جائے گی جبکہ عالمی تجارت کے لیے انتہائی اہم سمجھی جانے والی آبنائے ہرمز کو دوبارہ بحری آمدورفت کے لیے کھول دیا جائے گا، جس سے خطے میں کشیدگی میں کمی اور عالمی منڈیوں میں استحکام آنے کی توقع ہے۔