ٹرمپ کی ایران کو آج رات بڑی فوجی کارروائی کی دھمکی، تیل تنصیبات پر قبضے کا عندیہ

واشنگٹن: امریکی صدر ڈونلڈ ٹرمپ نے ایران کے خلاف سخت مؤقف اپناتے ہوئے عندیہ دیا ہے کہ امریکا آج رات ایران کے خلاف بڑی فوجی کارروائی کر سکتا ہے، جبکہ مستقبل قریب میں ایران کی اہم تیل تنصیبات پر کنٹرول حاصل کرنے کا بھی امکان ظاہر کیا ہے۔

سوشل میڈیا پر جاری اپنے بیان میں صدر ٹرمپ نے دعویٰ کیا کہ ایران کی بحری، فضائی اور دفاعی صلاحیتوں کو شدید نقصان پہنچ چکا ہے۔ ان کے مطابق ایران کی بحریہ، فضائیہ، ریڈار نظام، فضائی دفاع اور دیگر اہم عسکری تنصیبات اب مؤثر انداز میں کام کرنے کی پوزیشن میں نہیں رہیں۔

ٹرمپ نے مزید کہا کہ امریکا مستقبل قریب میں جزیرہ خارگ سمیت ایران کے اہم تیل انفراسٹرکچر مقامات کا کنٹرول سنبھال سکتا ہے، جس کے بعد ایران کی تیل اور گیس مارکیٹ کے انتظام و انصرام میں بھی امریکا اہم کردار ادا کرنے کی پوزیشن میں ہوگا۔

امریکی صدر نے اپنے بیان میں وینزویلا کی مثال دیتے ہوئے کہا کہ جس طرح امریکا نے وہاں توانائی کے شعبے میں اقدامات کیے اور وہ دونوں ممالک کے لیے فائدہ مند ثابت ہوئے، اسی طرز کا ماڈل ایران کے حوالے سے بھی اپنایا جا سکتا ہے۔

ٹرمپ کے اس بیان کے بعد مشرقِ وسطیٰ میں کشیدگی مزید بڑھنے کے خدشات پیدا ہوگئے ہیں۔ دفاعی اور سفارتی ماہرین کے مطابق اگر امریکا نے ایران کے خلاف نئی فوجی کارروائی کی تو اس کے اثرات نہ صرف خطے بلکہ عالمی توانائی منڈیوں پر بھی مرتب ہو سکتے ہیں۔

تاہم ایران کی جانب سے تاحال صدر ٹرمپ کے تازہ بیان پر کوئی باضابطہ ردعمل سامنے نہیں آیا، جبکہ عالمی برادری خطے کی بدلتی ہوئی صورتحال پر گہری نظر رکھے ہوئے ہے۔