ٹرمپ کی ایران کو وارننگ، آبنائے ہرمز سے متعلق غلط معلومات پر مذاکرات ختم کرنے کی دھمکی

واشنگٹن: امریکی صدر ڈونلڈ ٹرمپ نے خبردار کیا ہے کہ اگر آبنائے ہرمز میں جہازوں سے ٹول ٹیکس یا انشورنس فیس وصول نہ کیے جانے کے حوالے سے ایران کی فراہم کردہ معلومات غلط ثابت ہوئیں تو امریکا اور ایران کے درمیان جاری مذاکرات فوری طور پر ختم کر دیے جائیں گے۔

سوشل میڈیا پلیٹ فارم ٹروتھ سوشل پر جاری اپنے بیان میں ڈونلڈ ٹرمپ نے کہا کہ ایران نے امریکا کو یقین دہانی کرائی ہے کہ آبنائے ہرمز سے گزرنے والے جہازوں سے نہ کوئی ٹول ٹیکس لیا جا رہا ہے اور نہ ہی اضافی انشورنس فیس وصول کی جا رہی ہے۔

امریکی صدر نے کہا کہ واشنگٹن اس معلومات کا بغور جائزہ لے رہا ہے اور اگر حقائق اس کے برعکس سامنے آئے تو دونوں ممالک کے درمیان جاری سفارتی رابطے اور مذاکرات متاثر ہو سکتے ہیں۔

ڈونلڈ ٹرمپ نے اپنے بیان میں یہ بھی دعویٰ کیا کہ ایران کے بعض منجمد فنڈز مکمل طور پر امریکی کنٹرول میں ہیں اور ان فنڈز کو امریکی کسانوں کو ادائیگیوں کے لیے استعمال کیا جائے گا۔

انہوں نے کہا کہ ایران ان فنڈز کے ذریعے امریکا سے مکئی، گندم، سویابین اور دیگر غذائی اجناس خرید سکتا ہے۔ ٹرمپ کے مطابق ایران کو خوراک کی اشد ضرورت ہے اور یہ خریداری امریکی زرعی شعبے کے لیے بھی فائدہ مند ثابت ہوگی۔

امریکی صدر کے اس بیان کو خطے میں جاری کشیدگی اور ایران امریکا تعلقات کے تناظر میں اہم پیش رفت قرار دیا جا رہا ہے، جبکہ ماہرین کا کہنا ہے کہ آبنائے ہرمز سے متعلق کسی بھی تنازع کے عالمی توانائی منڈیوں اور بین الاقوامی تجارت پر دور رس اثرات مرتب ہو سکتے ہیں۔