وائٹ ہاؤس نے صدر ٹرمپ کے دورۂ چین کا شیڈول جاری کردیا، بیجنگ میں اہم ملاقاتیں متوقع

(واشنگٹن) وائٹ ہاؤس نے امریکی صدر ڈونلڈ ٹرمپ کے دورۂ چین کا تفصیلی شیڈول جاری کردیا، جس کے مطابق صدر ٹرمپ بدھ کی شام بیجنگ پہنچیں گے جہاں وہ چینی قیادت کے ساتھ اہم دوطرفہ مذاکرات کریں گے۔

وائٹ ہاؤس کے ترجمان کے مطابق جمعرات کی صبح صدر ٹرمپ کے اعزاز میں استقبالیہ تقریب منعقد کی جائے گی جبکہ جمعرات کی شام سرکاری ضیافت کا اہتمام ہوگا۔ دورے کے اختتام سے قبل جمعہ کے روز امریکی اور چینی صدور چائے کی خصوصی نشست میں شرکت کریں گے۔

اعلامیے میں کہا گیا ہے کہ امریکا اور چین مشترکہ تجارتی بورڈ اور سرمایہ کاری بورڈ کے قیام پر کام کریں گے۔ دونوں ممالک کے درمیان تجارت، سرمایہ کاری، زراعت، توانائی اور دیگر اہم شعبوں میں تعاون بڑھانے پر بھی تبادلہ خیال کیا جائے گا۔

وائٹ ہاؤس کے مطابق صدر ٹرمپ اپنے چینی ہم منصب کو رواں برس امریکا کے سرکاری دورے کی دعوت بھی دیں گے۔ اس کے علاوہ ملاقاتوں میں ایران اور روس کے حوالے سے چین کی پالیسی اور حمایت کے معاملات بھی زیر غور آئیں گے۔

سیاسی مبصرین کے مطابق یہ دورہ امریکا اور چین کے تعلقات میں نئی پیش رفت کا سبب بن سکتا ہے، خصوصاً ایسے وقت میں جب عالمی تجارت اور جغرافیائی سیاست کے اہم معاملات دونوں طاقتوں کے درمیان زیر بحث ہیں۔