صدر ٹرمپ آج سچویشن روم اجلاس میں ایران کی جنگ بندی تجاویز کا جائزہ لیں گے,برطانوی اخبار

واشنگٹن:صدر ڈونلڈ ٹرمپ آج وائٹ ہاؤس کے سچویشن روم میں اہم اجلاس کی صدارت کریں گے، جس میں ایران کی جانب سے جنگ بندی سے متعلق پیش کی گئی تجاویز کا جائزہ لیا جائے گا۔

برطانوی اخبار کے مطابق ایرانی تجاویز پاکستانی ذرائع کے ذریعے امریکا کو موصول ہو چکی ہیں، جبکہ ان تجاویز پر آج صدر ٹرمپ کی زیر صدارت اعلیٰ سطحی مشاورت متوقع ہے۔

رپورٹ کے مطابق اجلاس وائٹ ہاؤس کے ویسٹ ونگ میں قائم انٹیلی جنس کمپلیکس میں ہوگا، جہاں قومی سلامتی اور خارجہ پالیسی سے متعلق اہم ٹیمیں شریک ہوں گی۔

برطانوی اخبار نے دعویٰ کیا ہے کہ ایران نے ایٹمی ہتھیاروں سے متعلق مذاکرات کو مؤخر کرتے ہوئے آبنائے ہرمز کھولنے کی پیشکش کی ہے، جسے امریکی حکام انتہائی اہم سفارتی پیش رفت قرار دے رہے ہیں۔

ذرائع کے مطابق امریکا نے تاحال ایرانی تجاویز پر کوئی حتمی فیصلہ نہیں کیا، تاہم آج ہونے والا اجلاس آئندہ سفارتی سمت کے تعین میں اہم کردار ادا کرسکتا ہے۔

دوسری جانب وائٹ ہاؤس نے اس حوالے سے محتاط مؤقف اختیار کرتے ہوئے کہا ہے کہ یہ نہایت اہم اور حساس سفارتی معاملات ہیں، امریکا میڈیا کے ذریعے مذاکرات نہیں کرے گا۔