ایران درست فیصلہ کرے ورنہ ہم اپناکام مکمل کر دیں گے، ٹرمپ کی چین روانگی سے قبل ایران کو نئی دھمکی

امریکی صدر ڈونلڈ ٹرمپ نے ایران کو سخت پیغام دیتے ہوئے کہا ہے کہ اگر ایران نے اپنے رویے میں تبدیلی نہ کی تو امریکا “کام مکمل” کرے گا۔ انہوں نے واضح کیا کہ ایران کو جوہری ہتھیار رکھنے کی اجازت نہیں دی جاسکتی۔

واشنگٹن میں چین روانگی سے قبل میڈیا سے گفتگو کرتے ہوئے صدر ٹرمپ نے کہا کہ جو شخص یہ سمجھتا ہے کہ ایران کو ایٹمی ہتھیار رکھنے دیے جائیں، وہ “بے وقوف” ہے۔ انہوں نے کہا کہ امریکا ایران کے ساتھ ایک بہتر اور پرامن معاہدہ چاہتا ہے، تاہم اگر ایسا نہ ہوا تو امریکا ہر صورتحال کے لیے تیار ہے۔

صدر ٹرمپ نے کہا کہ ایران کے خلاف کامیابی امریکا کی ہوگی، چاہے وہ سفارتی طریقے سے حاصل ہو یا کسی اور انداز میں۔ ان کے مطابق امریکا خطے میں استحکام چاہتا ہے اور اسی مقصد کے لیے مختلف ممالک سے رابطے جاری ہیں۔

انہوں نے بتایا کہ اپنے دورۂ چین کے دوران وہ چینی صدر کے ساتھ ایران، مشرقِ وسطیٰ کی صورتحال اور عالمی سیکیورٹی امور پر تفصیلی بات چیت کریں گے، تاہم ایران کے معاملے پر امریکا کو چین کی مدد درکار نہیں۔

امریکی صدر نے پاکستان کے کردار کو بھی سراہتے ہوئے کہا کہ پاکستان نے مذاکراتی عمل میں اہم اور مثبت کردار ادا کیا۔ انہوں نے وزیراعظم شہباز شریف اورفیلڈ مارشل عاصم منیر کو شاندار شخصیات قرار دیتے ہوئے کہا کہ پاکستان کی ثالثی کی کوششیں قابلِ تعریف ہیں۔

صدر ٹرمپ نے امید ظاہر کی کہ ان کا دورۂ چین مثبت نتائج لے کر آئے گا اور خطے میں کشیدگی کم کرنے میں مددگار ثابت ہوگا۔