ایلون مسک کا ’گروک 4.5‘ بیٹا ٹیسٹنگ میں داخل، 55ویں سالگرہ پر اے آئی ماڈل سے متعلق بڑا اعلان

دنیا کے معروف ٹیکنالوجی ارب پتی ایلون مسک نے اپنی 55ویں سالگرہ کے موقع پر مصنوعی ذہانت کے نئے ماڈل ’گروک 4.5‘ سے متعلق اہم اعلان کرتے ہوئے بتایا ہے کہ اسے اندرونی بیٹا ٹیسٹنگ کے مرحلے میں داخل کر دیا گیا ہے۔

ایلون مسک کے مطابق گروک 4.5 کو ابتدائی طور پر اسپیس ایکس اور ٹیسلا کی ٹیموں میں نجی بیٹا ٹیسٹنگ کے لیے متعارف کرایا گیا ہے۔ ان کا کہنا تھا کہ یہ ماڈل 1.5 ٹریلین پیرامیٹرز پر مشتمل ’وی 9 فاؤنڈیشن ماڈل‘ پر مبنی ہے، جسے اضافی تربیت کے دوران کرسر ڈیٹا کی مدد سے مزید بہتر بنایا گیا ہے۔

انہوں نے دعویٰ کیا کہ ابتدائی جائزوں کے مطابق گروک 4.5 کی کارکردگی جدید مصنوعی ذہانت کے ماڈل ’اوپس‘ کے مساوی یا بعض شعبوں میں اس سے بہتر ثابت ہو سکتی ہے۔

ایلون مسک نے بتایا کہ ری انفورسمنٹ لرننگ کے ذریعے ماڈل کی صلاحیتوں میں مسلسل بہتری لائی جا رہی ہے اور گروک کی ترقی روزانہ کی بنیاد پر جاری ہے تاکہ اسے مزید مؤثر اور جدید بنایا جا سکے۔

انہوں نے مزید اعلان کیا کہ اسپیس ایکس اور اس سے وابستہ ٹیمیں رواں سال ہر ماہ ابتدا سے تربیت یافتہ ایک نیا مصنوعی ذہانت کا ماڈل متعارف کرائیں گی، جس کا مقصد اے آئی ٹیکنالوجی کی ترقی کی رفتار کو مزید تیز کرنا ہے۔