حکیم جیفریز کا امریکی ایوان نمائندگان کا آئندہ سپیکر بننے کا اعلان

واشنگٹن: امریکی ڈیموکریٹک پارٹی کے رہنما حکیم جیفریز نے ایوان نمائندگان کا آئندہ سپیکر بننے کے لیے باضابطہ طور پر اپنی امیدواری کا اعلان کر دیا ہے۔ انہوں نے اقتدار سنبھالنے کے ابتدائی 100 دنوں کے لیے اپنی جماعت کا سیاسی اور قانون سازی کا لائحہ عمل بھی پیش کر دیا۔

امریکی میڈیا رپورٹس کے مطابق حکیم جیفریز نے ڈیموکریٹک ارکان کے نام ایک خط میں کہا ہے کہ ایوان نمائندگان میں قیادت ملنے کی صورت میں ان کی جماعت ٹرمپ انتظامیہ کے اہم فیصلوں کو واپس لینے کے لیے اقدامات کرے گی۔

جیفریز کے مجوزہ منصوبے میں درآمدی محصولات کے خاتمے، صحت کی سہولتوں اور غذائی امداد کے لیے اربوں ڈالر کے فنڈز کی بحالی اور میڈیکیڈ پروگرام میں مزید کٹوتیوں کو روکنے کے لیے قانون سازی شامل ہے۔

انہوں نے کہا کہ ڈیموکریٹس مہنگائی پر قابو پانے اور عوام پر بڑھتے ہوئے معاشی بوجھ کو کم کرنے کے لیے ہر ممکن کوشش کریں گے تاکہ شہریوں کو ریلیف فراہم کیا جا سکے۔

خط میں حکیم جیفریز نے مؤقف اختیار کیا کہ اپوزیشن میں رہتے ہوئے بھی ڈیموکریٹس نے ٹرمپ انتظامیہ کے اقدامات پر مؤثر دباؤ ڈالا، تاہم ایوان نمائندگان میں اکثریت حاصل ہونے کے بعد عوام کی جانب سے مطلوبہ تبدیلی لانا ان کی جماعت کی اہم ذمہ داری ہوگی۔

واضح رہے کہ حکیم جیفریز کو رواں ماہ ڈیموکریٹک پارٹی کے اندر خفیہ رائے شماری کا سامنا کرنا ہوگا، جبکہ ایوان نمائندگان کے سپیکر کے انتخاب کے لیے حتمی ووٹنگ جنوری میں متوقع ہے۔

اگر حکیم جیفریز سپیکر منتخب ہو جاتے ہیں تو وہ امریکی تاریخ کے پہلے سیاہ فام سپیکر بننے کا اعزاز حاصل کر لیں گے۔