9 مئی کیس: 2023 سے روپوش سابق رکن قومی اسمبلی حماد اظہر گرفتار

لاہور پولیس نے سابق رکن قومی اسمبلی اور پاکستان تحریک انصاف (پی ٹی آئی) پنجاب کے سابق صدر حماد اظہر کو گرفتار کر لیا ہے۔

پولیس ذرائع کے مطابق حماد اظہر کو لاہور کے علاقے آر اے بازار کے قریب ایک دوست کے گھر سے گرفتار کیا گیا، جس کے بعد انہیں لاہور پولیس کے حوالے کر دیا گیا ہے۔

پولیس ذرائع کا کہنا ہے کہ حماد اظہر 9 مئی 2023 کے واقعات سے متعلق مختلف مقدمات میں نامزد ہیں۔ وہ 9 مئی 2023 سے پولیس کو مطلوب اور اشتہاری قرار دیے گئے تھے۔

ذرائع کے مطابق حماد اظہر اپنے والد کے انتقال کے موقع پر منظر عام پر آئے تھے، تاہم اس کے بعد دوبارہ روپوش ہوگئے تھے۔

انسداد دہشت گردی کی عدالت نے عدم پیشی کے باعث حماد اظہر کو اشتہاری قرار دے رکھا تھا جبکہ عدالت کی جانب سے ان کے دائمی وارنٹ گرفتاری بھی جاری کیے گئے تھے۔

پولیس ذرائع کے مطابق گرفتاری کے بعد حماد اظہر کو انویسٹی گیشن ونگ کے حوالے کر دیا گیا ہے۔ ذرائع کا دعویٰ ہے کہ وہ 9 مئی سے متعلق 50 سے زائد مقدمات میں نامزد ملزم ہیں۔

حماد اظہر نے گرفتاری سے قبل لاہور اور پشاور ہائی کورٹس سے حفاظتی ضمانت کے لیے بھی رجوع کر رکھا تھا۔

واضح رہے کہ مختلف مقدمات کے اندراج کے بعد حماد اظہر نے پی ٹی آئی کے پارٹی عہدے سے استعفیٰ دے دیا تھا۔ پی ٹی آئی نے انہیں پنجاب کی صدارت کی ذمہ داری سونپ رکھی تھی۔