کراچی: سرکاری اسپتال میں مبینہ طور پر ایچ آئی وی پھیلنے کا معاملہ، متاثرہ بچوں کے والدین سندھ ہائیکورٹ پہنچ گئے

(کراچی) کراچی کے سائٹ ایریا میں واقع سرکاری ولیکا اسپتال میں مبینہ طور پر استعمال شدہ سرنجوں کے ذریعے ایچ آئی وی پھیلنے کے معاملے پر متاثرہ بچوں کے والدین نے سندھ ہائیکورٹ سے رجوع کر لیا، جس پر عدالت نے سندھ حکومت سے دو ہفتوں کے اندر تفصیلی رپورٹ طلب کر لی ہے۔

درخواست گزاروں نے عدالت میں مؤقف اختیار کیا کہ ولیکا اسپتال میں مبینہ طور پر استعمال شدہ سرنجوں کے باعث متعدد بچے ایچ آئی وی سے متاثر ہوئے۔ درخواست کے مطابق اب تک 9 بچوں کے انتقال کا دعویٰ کیا گیا ہے، جبکہ متاثرہ خاندانوں کا کہنا ہے کہ حکومت اس معاملے میں مؤثر اقدامات کرنے میں ناکام رہی ہے، اس لیے انصاف کے لیے عدالت سے رجوع کرنا پڑا۔

سماعت کے دوران جسٹس عدنان کریم نے ریمارکس دیے کہ عدالت کو اپنا کام کرنے دیا جائے اور اگر تقریر کرنی ہے تو عدالت کے باہر کی جائے۔ انہوں نے کہا کہ عدالت قانون کے مطابق کارروائی کرے گی اور تمام فریقین کا مؤقف سننے کے بعد ہی کسی نتیجے پر پہنچا جائے گا۔

عدالت نے سندھ حکومت اور دیگر متعلقہ فریقین کو نوٹس جاری کرتے ہوئے دو ہفتوں میں جواب اور پیش رفت رپورٹ جمع کرانے کی ہدایت کی، جبکہ کیس کی مزید سماعت 20 جولائی تک ملتوی کر دی۔

متاثرہ خاندانوں نے مطالبہ کیا ہے کہ واقعے کی شفاف تحقیقات کرائی جائیں، ذمہ داروں کا تعین کیا جائے اور متاثرہ بچوں و ان کے اہل خانہ کو انصاف فراہم کیا جائے۔