اکنا ریلیف میری لینڈ نے 200 سے زائد بچوں میں مفت اسکول بیگز تقسیم کر دیے

میری لینڈ: نئے تعلیمی سال کے آغاز سے قبل اکنا ریلیف میری لینڈکی جانب سے ایک خصوصی تقریب کا انعقاد کیا گیا، جس میں 200 سے زائد بچوں میں مفت اسکول بیگز تقسیم کیے گئے تاکہ وہ نئے تعلیمی سال کا آغاز بہتر تیاری، اعتماد اور خوشی کے ساتھ کر سکیں۔

تقریب کے دوران بچوں کے چہروں پر خوشی اور والدین کے اطمینان نے اس موقع کو یادگار بنا دیا۔ اسکول بیگز کی تقسیم کا مقصد مستحق اور ضرورت مند خاندانوں کے بچوں کی تعلیمی ضروریات میں معاونت فراہم کرنا اور انہیں نئے تعلیمی سال کے لیے ضروری سامان مہیا کرنا تھا۔

اس موقع پر تنظیم کے نمائندوں نے کہا کہ تعلیم ہر بچے کا بنیادی حق ہے، اور کمیونٹی کے تعاون سے ایسے اقدامات بچوں کے روشن مستقبل کی جانب ایک اہم قدم ثابت ہوتے ہیں۔ انہوں نے اس عزم کا بھی اظہار کیا کہ مستقبل میں بھی اسی نوعیت کے فلاحی منصوبوں کے ذریعے زیادہ سے زیادہ خاندانوں تک پہنچنے کی کوشش جاری رکھی جائے گی۔

اکنا ریلیف میری لینڈ نے اس کامیاب پروگرام پر اپنے تمام عطیہ دہندگان، رضاکاروں اور کمیونٹی پارٹنرز کا تہہ دل سے شکریہ ادا کرتے ہوئے کہا کہ انہی کے تعاون، اعتماد اور سخاوت کی بدولت یہ تقریب کامیابی سے منعقد ہوئی۔

تنظیم نے امید ظاہر کی کہ آئندہ بھی ایسے فلاحی اقدامات کا سلسلہ جاری رہے گا تاکہ مزید بچوں کو معیاری تعلیم کے سفر میں ضروری سہولیات فراہم کی جا سکیں اور ضرورت مند خاندانوں کی بھرپور معاونت ممکن بنائی جا سکے۔