اوٹاوا میں پاکستان کا 79واں یومِ آزادی اور قائدِ اعظم محمد علی جناح کی 150ویں سالگرہ کی تقریبات

اوٹاوا، کینیڈا: پاکستان کے 79ویں یومِ آزادی اور بانیٔ پاکستان قائدِ اعظم محمد علی جناح کی 150ویں سالگرہ کے سلسلے میں کینیڈا کے دارالحکومت اوٹاوا میں خصوصی تقریب کا انعقاد کیا گیا۔ پاکستان ہائی کمیشن اوٹاوا سمیت مونٹریال، ٹورنٹو اور وینکوور میں پاکستانی قونصلیٹ جنرلز نے بھی سال بھر جاری رہنے والی تقریبات کا آغاز کیا۔

اوٹاوا میں پاکستانی ہائی کمیشن کی عمارت میں پرچم کشائی کی پروقار تقریب منعقد ہوئی، جس میں صدرِ پاکستان، وزیراعظم اور نائب وزیراعظم و وزیرِ خارجہ کے خصوصی پیغامات شرکاء کو پڑھ کر سنائے گئے۔

تقریب کے دوران قائدِ اعظم محمد علی جناح کی زندگی، قیادت اور پاکستان کے قیام کے لیے تاریخی جدوجہد کو اجاگر کرنے والی دستاویزی فلم بھی دکھائی گئی۔ اس کے علاوہ قائدِ اعظم کی زندگی کے اہم لمحات اور پاکستان کی تاریخ کے نمایاں سنگِ میل پر مبنی ڈیجیٹل تصویری نمائش کا بھی اہتمام کیا گیا۔

اپنے خطاب میں ہائی کمشنر محمد سلیم نے پاکستانی قوم کو 79ویں یومِ آزادی کی مبارکباد پیش کی اور قائدِ اعظم محمد علی جناح کی لازوال میراث کو خراجِ عقیدت پیش کیا۔ انہوں نے کہا کہ پاکستان ایک پرامن، جمہوری اور خوشحال ملک کے قیام کے لیے قائدِ اعظم کے وژن پر کاربند ہے۔

ہائی کمشنر نے کہا کہ پاکستان ریاستوں کے درمیان امن، بات چیت، تعاون اور باہمی احترام کے فروغ کے لیے اپنی کوششیں جاری رکھے گا۔ انہوں نے کینیڈا میں مقیم پاکستانی کمیونٹی کے عوامی سطح پر روابط مضبوط بنانے میں اہم کردار کو بھی سراہا۔

تقریب میں گریٹر اوٹاوا سے پاکستانی کمیونٹی کے نمائندوں اور پاکستان کے خیر خواہوں کی بڑی تعداد نے شرکت کی۔ خاندانوں اور بالخصوص نوجوانوں کی بھرپور شرکت نے وطن سے محبت اور قومی جذبے کی عکاسی کی۔

شرکاء نے پاکستان کے تحفظ اور قومی امنگوں کی تکمیل کے لیے پاکستانی عوام اور مسلح افواج کی قربانیوں اور بہادری کو خراجِ تحسین پیش کیا۔ اس موقع پر اس عزم کا اظہار بھی کیا گیا کہ قائدِ اعظم محمد علی جناح کے اصول، دور اندیشی اور پاکستان کے وژن کو نئی نسل تک منتقل کیا جائے گا۔