شہید آیت اللہ خامنہ ای کے قاتل انجام سے نہیں بچ سکیں گے، ایرانی آرمی چیف امیر حاتمی

(تہران) ایرانی آرمی چیف میجر جنرل امیر حاتمی نے کہا ہے کہ ایران کے سابق سپریم لیڈر شہید آیت اللہ خامنہ ای کے قتل کے ذمہ داروں کا تعاقب کیا جائے گا اور وہ اپنے انجام سے ہرگز نہیں بچ سکیں گے۔

اپنے بیان میں میجر جنرل امیر حاتمی نے کہا کہ شہید سپریم لیڈر آیت اللہ خامنہ ای نے ایران کے لیے عزت، آزادی اور قومی وقار کا راستہ متعین کیا، جس پر ایران کی مسلح افواج مکمل ثابت قدمی، اتحاد اور عزم کے ساتھ گامزن رہیں گی۔

انہوں نے کہا کہ ایران کی مسلح افواج ملک کی خودمختاری، سلامتی اور قومی مفادات کے تحفظ کے لیے اپنی ذمہ داریاں پوری کرتی رہیں گی اور کسی بھی خطرے کا بھرپور جواب دینے کے لیے تیار ہیں۔

ایرانی آرمی چیف کا کہنا تھا کہ موجودہ سپریم لیڈر آیت اللہ سید مجتبیٰ خامنہ ای کی قیادت میں مسلح افواج بغیر کسی ہچکچاہٹ کے اپنے فرائض انجام دیتی رہیں گی اور ملک کے دفاع کے لیے ہر ممکن اقدام کیا جائے گا۔

میجر جنرل امیر حاتمی نے اس عزم کا اعادہ کیا کہ شہید آیت اللہ خامنہ ای کے قتل میں ملوث عناصر کو انصاف کے کٹہرے میں لایا جائے گا اور وہ اپنے انجام سے بچ نہیں سکیں گے۔