ایران کے متحدہ عرب امارات پر میزائل حملے، دبئی و شارجہ ایئرپورٹس پر فلائٹ آپریشن معطل

(متحدہ عرب امارات) اماراتی وزارتِ دفاع کے مطابق ایران نے چار میزائل داغے، تاہم اماراتی وزارتِ دفاع کے فضائی دفاعی نظام نے بروقت کارروائی کرتے ہوئے تین میزائل راستے میں ہی تباہ کر دیے جبکہ چوتھا میزائل سمندر میں گر کر ناکارہ ہو گیا۔

حکام کا کہنا ہے کہ میزائلوں کا ممکنہ ہدف ابوظہبی کی اہم تنصیبات تھیں، تاہم کسی بڑے جانی یا مالی نقصان کی اطلاع نہیں ملی۔ سیکیورٹی کے پیش نظر ملک بھر میں فضائیہ اور میزائل دفاعی نظام کو ہائی الرٹ کر دیا گیا ہے۔

صورتحال کے باعث دبئی اور شارجہ ایئرپورٹس پر فلائٹ آپریشن عارضی طور پر روک دیا گیا، جبکہ سیکیورٹی ادارے مکمل الرٹ ہیں۔

میڈیا رپورٹس کے مطابق شہریوں کو موبائل فونز کے ذریعے ہنگامی پیغامات بھیجے گئے، جن میں ممکنہ میزائل خطرے کے پیش نظر محفوظ مقامات پر منتقل ہونے کی ہدایت کی گئی۔ بعد ازاں حکام نے صورتحال کو "محفوظ" قرار دیتے ہوئے معمولات زندگی بحال کرنے کی اجازت دی، تاہم احتیاط جاری رکھنے کا کہا گیا ہے۔

دوسری جانب فجیرہ پیٹرولیم انڈسٹریل میں آگ لگنے کی تصدیق ہوئی ہے، جس کی ممکنہ وجہ ایران کی جانب سے مبینہ ڈرون حملہ قرار دی جا رہی ہے۔ فجیرہ سول ڈیفنس کی ٹیمیں موقع پر پہنچ کر آگ پر قابو پانے کی کوششوں میں مصروف ہیں۔