ایرانی آئل ٹینکروں پر حملہ ہوا تو خطے میں امریکی تنصیبات کو نشانہ بنائیں گے ، پاسداران انقلاب

(ایران) پاسدارانِ انقلاب نے خبردار کیا ہے کہ اگر ایرانی آئل ٹینکروں پر حملہ کیا گیا تو خطے میں موجود امریکی تنصیبات اور جارح دشمن کے جہاز ایران کے میزائلوں اور ڈرونز کی زد میں ہوں گے۔

پاسدارانِ انقلاب کی جانب سے جاری بیان میں کہا گیا کہ ایران کے دفاعی نظام مکمل طور پر تیار ہیں اور کسی بھی جارحیت کا فوری اور سخت جواب دیا جائے گا۔ بیان کے مطابق ایرانی میزائل اور ڈرون خطے میں امریکی اہداف کو نشانہ بنانے کی بھرپور صلاحیت رکھتے ہیں۔

ایرانی حکام نے اس عزم کا اظہار بھی کیا کہ دشمن کی سازشیں علمائے حق اور ایرانی قوم کے حوصلے پست نہیں کر سکتیں اور ایران اپنی قومی سلامتی اور خودمختاری کے تحفظ کے لیے ہر ممکن اقدام کرے گا۔

دوسری جانب فرانسیسی خبر رساں ادارے اے ایف پی کے مطابق امریکا نے پاکستانی ثالثوں کے ذریعے ایران کو تجاویز بھجوائی ہیں، جن میں جنگ بندی میں توسیع اور کشیدگی کم کرنے کے امکانات شامل ہیں۔

امریکی صدرڈونلڈ ٹرمپ نے امید ظاہر کی ہے کہ ایران جلد امریکی تجاویز پر مثبت جواب دے گا، تاہم انہوں نے خبردار کیا کہ اگر مذاکرات ناکام ہوئے تو “آپریشن پروجیکٹ فریڈم” کو مزید شدت کے ساتھ جاری رکھا جائے گا۔

مشرقِ وسطیٰ میں بڑھتی ہوئی کشیدگی کے باعث عالمی برادری صورتحال پر گہری نظر رکھے ہوئے ہے، جبکہ ماہرین نے خبردار کیا ہے کہ کسی بھی بڑے تصادم کے اثرات عالمی تیل منڈی اور علاقائی امن پر مرتب ہو سکتے ہیں۔