ایران کی ستمبر میں تیل کی فروخت 2 سال کی بلند ترین سطح پر پہنچ گئی

تہران: امریکا اور اسرائیل کے ساتھ جاری کشیدگی کے باوجود ایران کی تیل کی فروخت ستمبر میں گزشتہ دو سال کی بلند ترین سطح پر پہنچ گئی ہے۔

ایرانی میڈیا کے مطابق تازہ ترین اعداد و شمار میں بتایا گیا ہے کہ ستمبر کے دوران ایران کی تیل کی فروخت 3 ارب ڈالر سے تجاوز کر گئی، جو گزشتہ دو برس کے دوران کسی ایک ماہ میں تیل کی فروخت کی سب سے زیادہ سطح ہے۔

ایرانی حکام کا کہنا ہے کہ تیل سے حاصل ہونے والی آمدنی اب تک بجٹ میں مقررہ ہدف سے بھی تجاوز کر چکی ہے۔ حکام کے مطابق اضافی آمدنی سے حکومت کو اشیا کی درآمد اور قومی ترقیاتی منصوبوں کو آگے بڑھانے کے لیے مزید مالی گنجائش حاصل ہوئی ہے۔

رپورٹ کے مطابق ایران کو امریکا کی پابندیوں اور خطے میں جاری کشیدگی کے باوجود اپنی تیل کی برآمدات اور آمدنی برقرار رکھنے میں کامیابی حاصل ہوئی ہے۔ تاہم تیل کی فروخت سے متعلق اعداد و شمار اور حکومتی دعووں کی آزادانہ طور پر تصدیق اس رپورٹ میں شامل نہیں ہے۔