امریکا اور ایرانی پاسدارانِ انقلاب کے درمیان براہِ راست رابطہ قائم کرنے پر اتفاق

(واشنگٹن) امریکی نائب صدر جے ڈی وینس نے انکشاف کیا ہے کہ امریکا نے خطے میں کشیدگی کم کرنے کے لیے ایرانی پاسدارانِ انقلاب کے ساتھ ایک براہِ راست رابطہ چینل قائم کرنے پر اتفاق کیا ہے۔

برطانوی ویب سائٹ کو دیے گئے ایک انٹرویو میں جے ڈی وینس نے بتایا کہ اس انتظام کے تحت ایرانی پاسدارانِ انقلاب کے نمائندے اور امریکی سینٹرل کمانڈ کے اہلکار قطر کے دارالحکومت دوحہ میں ملاقاتیں کریں گے تاکہ باہمی تنازعات اور ممکنہ غلط فہمیوں کو بات چیت کے ذریعے حل کیا جا سکے۔

ان کے مطابق ایرانی حکام نے تجویز دی کہ پاسدارانِ انقلاب کا ایک نمائندہ دوحہ بھیجا جائے، جہاں وہ امریکی سینٹرل کمانڈ کے ایک اہلکار سے براہِ راست ملاقات کرے گا اور مختلف معاملات پر رابطہ برقرار رکھا جائے گا۔

جے ڈی وینس کا کہنا تھا کہ اس رابطہ چینل کا مقصد دونوں ممالک کے درمیان کشیدگی کو کم کرنا اور ایسے تنازعات کو روکنا ہے جو براہِ راست رابطے کی عدم موجودگی میں مزید سنگین صورت اختیار کر سکتے ہیں۔

انہوں نے مزید بتایا کہ متحدہ عرب امارات نے بھی ایران کے ساتھ ایسے نئے رابطے استوار کیے ہیں، جن میں پاسدارانِ انقلاب کے ساتھ براہِ راست بات چیت بھی شامل ہے۔ ان کے مطابق یہ ایسے سفارتی روابط ہیں جو ماضی میں موجود نہیں تھے اور خطے میں استحکام کی کوششوں کا حصہ ہیں۔