ایران ایٹمی ہتھیار نہیں بنا سکتا، معاہدہ ناکام ہوا تو دیگر آپشنز استعمال کریں گے: مارکو روبیو

امریکی وزیر خارجہ مارکو روبیونے ایران کے ساتھ جاری جوہری مذاکرات کے حوالے سے سخت مؤقف اختیار کرتے ہوئے کہا ہے کہ اگر معاہدہ نہ ہوا تو امریکا کے پاس دیگر آپشنز بھی موجود ہیں۔

کابینہ اجلاس کے دوران گفتگو کرتے ہوئے مارکو روبیو نے کہا کہ ایران کے ساتھ مذاکرات میں کچھ پیش رفت ہوئی ہے اور آئندہ چند گھنٹوں یا دنوں میں صورتحال مزید واضح ہو جائے گی۔ انہوں نے زور دیتے ہوئے کہا کہ امریکا یہ واضح سمجھتا ہے کہ ایران ایٹمی ہتھیار حاصل نہیں کر سکتا۔

امریکی وزیر خارجہ کا کہنا تھا کہ صدرڈونلڈ ٹرمپ ہمیشہ سے اس معاملے کو مذاکرات اور سفارتکاری کے ذریعے حل کرنے کو ترجیح دیتے آئے ہیں، تاہم اگر سفارتی کوششیں کامیاب نہ ہوئیں تو امریکا کے پاس متبادل راستے بھی موجود ہیں۔

مارکو روبیو نے مزید کہا کہ واشنگٹن اس وقت مذاکراتی عمل کو کامیاب بنانے کے لیے ہر ممکن موقع دینا چاہتا ہے تاکہ خطے میں کشیدگی میں اضافہ نہ ہو۔

دوسری جانب عالمی مبصرین کا کہنا ہے کہ امریکا اور ایران کے درمیان جاری مذاکرات مشرقِ وسطیٰ کی صورتحال، عالمی تیل مارکیٹ اور خطے کے امن کے لیے انتہائی اہمیت اختیار کر چکے ہیں۔