امریکا کا لیبیا میں اتحاد اور پائیدار امن کی کوششوں کی حمایت کا اعلان

(واشنگٹن) امریکا نے لیبیا میں قومی اتحاد کی بحالی اور پائیدار امن کے قیام کی کوششوں کی حمایت جاری رکھنے کا اعلان کیا ہے۔

عالمی میڈیا کے مطابق امریکی وزیر خارجہ مارکو روبیو نے واشنگٹن میں لیبیائی نیشنل آرمی کے نائب کمانڈر صدام حفتر سے ملاقات کے بعد سوشل میڈیا پلیٹ فارم ایکس پر اپنے بیان میں کہا کہ امریکی انتظامیہ لیبیا میں اتحاد کی بحالی کے لیے اپنے بین الاقوامی شراکت داروں کے ساتھ مل کر کام جاری رکھے گی۔

مارکو روبیو نے بتایا کہ ملاقات کے دوران لیبیا کی فوج کو متحد کرنے، سکیورٹی اداروں کو مضبوط بنانے اور ملک میں پائیدار امن کے لیے سازگار حالات پیدا کرنے پر تفصیلی تبادلہ خیال کیا گیا۔

انہوں نے کہا کہ امریکا لیبیائی قیادت اور بین الاقوامی شراکت داروں کے ساتھ تعاون جاری رکھتے ہوئے ایک پرامن، متحد اور خوشحال لیبیا کے قیام کی حمایت کرتا رہے گا۔

امریکی وزیر خارجہ کے مطابق لیبیا میں سیاسی استحکام، قومی مفاہمت اور متحدہ سکیورٹی ڈھانچے کا قیام خطے میں امن و استحکام کے لیے بھی اہمیت رکھتا ہے۔