مریم نواز کی بیٹی ماہ نور صفدر کا اذان جبار سے نکاح، جاتی امرا میں تقریب

لاہور: وزیراعلیٰ پنجاب مریم نواز کی صاحبزادی ماہ نور صفدر کے نکاح کی تقریب جاتی امرا میں منعقد ہوئی، جسے نجی اور خاندانی تقریب تک محدود رکھا گیا۔

خاندانی ذرائع کے مطابق نکاح کی تقریب میں مسلم لیگ (ن) کے صدر نواز شریف، وزیراعظم شہباز شریف، حسن نواز، حسین نواز اور شریف خاندان کے دیگر افراد سمیت قریبی عزیز و اقارب نے شرکت کی۔

نائب وزیراعظم اسحاق ڈار اور پنجاب کی سینیئر وزیر مریم اورنگزیب بھی تقریب میں شریک ہوئیں۔

اذان جبار کا تعلق معروف کاروباری خاندان سے

خاندانی ذرائع کے مطابق ماہ نور صفدر کے شوہر اذان جبار کا تعلق ایک معروف کاروباری گھرانے سے ہے۔ ان کے والد جبار خالد ملک کے نامور صنعت کار ہیں جبکہ ان کا خاندان فلور ملز کی صنعت سے وابستہ بتایا جاتا ہے۔

دوسری جانب ماہ نور صفدر کے نکاح کی تصاویر اور ویڈیوز سوشل میڈیا پر گردش کر رہی ہیں۔ ایک ویڈیو میں ماہ نور صفدر کو دلہن کے لباس میں دیکھا جا سکتا ہے، جبکہ ایک اور ویڈیو میں وزیراعظم شہباز شریف، نواز شریف اور خاندان کے دیگر افراد کو گاڑی میں لاتے ہوئے دکھایا گیا ہے۔

لندن سے اعلیٰ تعلیم مکمل کرنے کے بعد وطن واپسی

ماہ نور صفدر نے حال ہی میں لندن کی ایس او اے ایس یونیورسٹی سے اعلیٰ تعلیم اور گریجویشن مکمل کی ہے۔ مریم نواز بھی اپنی صاحبزادی کی گریجویشن تقریب میں شرکت کے لیے لندن گئی تھیں۔

بیٹی کی گریجویشن کے موقع پر مریم نواز نے خوشی کا اظہار کرتے ہوئے کہا تھا کہ اللہ کے فضل و کرم سے ان کے تینوں بچوں نے اپنی اعلیٰ تعلیم مکمل کرلی ہے۔

نکاح کی تقریب کو نجی رکھنے کے باعث اس میں صرف خاندان اور قریبی عزیز و اقارب کو مدعو کیا گیا، تاہم تقریب سے متعلق ویڈیوز سوشل میڈیا پر صارفین کی توجہ حاصل کر رہی ہیں۔