آبنائے ہرمز کشیدگی، چین اور سعودی عرب متحرک، فوری جنگ بندی پر زور

(بیجنگ/ریاض)آبنائے ہرمز میں بڑھتی ہوئی کشیدگی کے پیش نظر چین اور سعودی عرب نے سفارتی رابطے تیز کر دیے اور فوری جنگ بندی پر زور دیا ہے۔

غیر ملکی خبر رساں اداروں کے مطابق چینی صدر شی جن پنگ اور سعودی ولی عہد شہزادہ محمد بن سلمان کے درمیان ٹیلیفونک رابطہ ہوا، جس میں خطے کی موجودہ صورتحال اور بڑھتی کشیدگی پر تفصیلی تبادلہ خیال کیا گیا۔

چینی صدر شی جن پنگ نے آبنائے ہرمز سے جہازوں کی معمول کے مطابق آمد و رفت برقرار رکھنے پر زور دیتے ہوئے کہا کہ عالمی تجارت کا تسلسل انتہائی ضروری ہے۔ انہوں نے تنازعات کے حل کیلئے طاقت کے بجائے سفارتی اور سیاسی ذرائع اختیار کرنے کی ضرورت پر بھی زور دیا۔

چینی صدر نے فوری اور جامع جنگ بندی کی حمایت کرتے ہوئے کہا کہ خطے میں کشیدگی کم کرنا عالمی معیشت اور توانائی کی فراہمی کے لیے ناگزیر ہے۔

گفتگو کے دوران سعودی ولی عہد محمد بن سلمان نے بھی مشرق وسطیٰ میں امن و استحکام کے لیے مشترکہ کوششوں کی ضرورت پر زور دیا اور خطے میں کشیدگی کم کرنے کیلئے تعاون جاری رکھنے کے عزم کا اظہار کیا۔

دونوں رہنماؤں نے اس بات پر اتفاق کیا کہ آبنائے ہرمز میں صورتحال کو مزید بگڑنے سے روکنے کیلئے سفارتی کوششیں تیز کرنا ضروری ہے۔