آئی ایم ایف کی پانچویں قسط کی تیاری شروع، پاکستان کو 1.2 ارب ڈالر ملنے کا امکان

اسلام آباد:پاکستان نے عالمی مالیاتی فنڈ (آئی ایم ایف) کے ایکسٹینڈڈ فنڈ فیسیلیٹی (EFF) پروگرام کے تحت پانچویں قسط کے حصول کے لیے تیاریوں کا آغاز کر دیا ہے۔ وزارتِ خزانہ نے آئندہ ماہ ہونے والے پروگرام جائزے کے لیے متعلقہ وزارتوں کو ضروری ڈیٹا اور رپورٹس مرتب کرنے کی ہدایت کر دی ہے۔

ذرائع وزارتِ خزانہ کے مطابق پاکستان اور آئی ایم ایف کے درمیان پروگرام کے جائزے کے لیے مذاکرات آئندہ ماہ متوقع ہیں، جس کے لیے آئی ایم ایف کا وفد پاکستان کا دورہ کرے گا۔

مذاکرات کی تیاری کے سلسلے میں وزارتِ خزانہ نے تمام متعلقہ وزارتوں اور اداروں کو معاشی اہداف، اصلاحات اور اسٹرکچرل بینچ مارکس سے متعلق تازہ ترین معلومات فراہم کرنے کی ہدایت کی ہے۔ متعلقہ وزارتیں آئی ایم ایف وفد کو پروگرام کے تحت کیے گئے اقدامات اور مستقبل کے اہداف پر بریفنگ دیں گی۔

ذرائع کے مطابق مذاکرات میں توانائی کے شعبے میں اصلاحات، بجلی اور گیس کے شعبوں کے سرکلر ڈیٹ سمیت دیگر اہم معاشی اہداف کا بھی جائزہ لیا جائے گا۔ آئی ایم ایف پروگرام کے تحت مقرر کردہ اہداف پر پیش رفت اور اصلاحات کی صورتحال مذاکرات کا اہم حصہ ہوگی۔

ذرائع کا کہنا ہے کہ اگر پاکستان اور آئی ایم ایف کے درمیان مذاکرات کامیاب رہے اور پروگرام ریویو مکمل ہوگیا تو موجودہ قرض پروگرام کے تحت پاکستان کو مجموعی طور پر تقریباً 1.2 ارب ڈالر ملنے کا امکان ہے۔

اس رقم میں تقریباً 1 ارب ڈالر پانچویں قسط کی صورت میں جبکہ تقریباً 20 کروڑ ڈالر موسمیاتی تبدیلیوں سے ہونے والے نقصانات سے نمٹنے کے لیے فراہم کیے جانے کا امکان ہے۔

آئی ایم ایف پروگرام کا یہ جائزہ پاکستان کی معیشت، توانائی کے شعبے کی اصلاحات، سرکلر ڈیٹ میں کمی اور مالیاتی اہداف کے حوالے سے اہم قرار دیا جا رہا ہے۔