برطانوی جریدے کا دعویٰ: مودی کو ملنے والے کئی غیر ملکی ایوارڈز دوروں سے چند روز قبل ہی تخلیق کیے گئے

برطانوی اخبار دی گارڈین نے بھارتی وزیرِ اعظم نریندر مودی کو مختلف ممالک کی جانب سے دیے جانے والے غیر ملکی اعزازات پر سوالات اٹھاتے ہوئے دعویٰ کیا ہے کہ ان میں سے متعدد ایوارڈز مودی کے سرکاری دوروں سے چند روز قبل ہی متعارف کرائے گئے، جبکہ بعض اعزازات کے وہ پہلے یا اب تک واحد وصول کنندہ ہیں۔

رپورٹ کے مطابق سیشلز کا "Guardian of the Blue Horizon" ایوارڈ مودی کے دورۂ سیشلز سے صرف تین روز قبل تخلیق کیا گیا تھا۔ اخبار نے یہ بھی دعویٰ کیا کہ ابتدائی سرٹیفکیٹ میں "Republic" اور "Seychelles" کے الفاظ کی املا میں غلطیاں موجود تھیں اور اس کے مصنوعی ذہانت (AI) سے تیار کیے جانے کے خدشات بھی سامنے آئے۔

تاہم سیشلز کی وزارتِ خارجہ نے ان دعوؤں کی تردید کرتے ہوئے وضاحت کی کہ غلطیوں والا سرٹیفکیٹ محض ایک ورکنگ ڈرافٹ تھا، جبکہ بعد ازاں باضابطہ طور پر منظور شدہ اصل سرٹیفکیٹ جاری کیا گیا اور ایوارڈ کو مکمل طور پر مستند قرار دیا گیا۔

دی گارڈین نے اپنی رپورٹ میں مزید دعویٰ کیا کہ اسرائیلی پارلیمنٹ کنیسٹ کا "Medal of the Knesset" بھی مودی کے دورے سے چند روز قبل متعارف کرایا گیا اور وہ اب تک اس اعزاز کے واحد وصول کنندہ ہیں۔

رپورٹ میں 2019 کے "Philip Kotler Presidential Award" کا بھی ذکر کیا گیا، جس کے بارے میں کہا گیا کہ اگرچہ اسے ہر سال کسی قومی رہنما کو دینے کا اعلان کیا گیا تھا، تاہم مودی کے بعد یہ اعزاز کسی اور شخصیت کو نہیں دیا گیا۔

اخبار کے مطابق گزشتہ ایک سال کے دوران مودی کو ایتھوپیا، ٹرینیڈاڈ اینڈ ٹوباگو سمیت مختلف ممالک کے اعلیٰ اعزازات بھی ملے، جن میں بعض کے وہ پہلے غیر ملکی یا واحد وصول کنندہ قرار پائے۔

بھارتی اپوزیشن جماعت کانگریس نے ان اعزازات پر تنقید کرتے ہوئے الزام عائد کیا کہ مودی حکومت بیرونی اعزازات کو داخلی سیاسی تشہیر اور عوامی امیج سازی کے لیے استعمال کر رہی ہے۔

دوسری جانب بھارتیہ جنتا پارٹی (بی جے پی) کا کہنا ہے کہ یہ اعزازات وزیرِ اعظم نریندر مودی کی عالمی سفارتی کامیابیوں، بین الاقوامی قیادت اور ماحولیاتی اقدامات کے اعتراف کا اظہار ہیں۔

دی گارڈین کے مطابق مودی کو ملنے والے غیر ملکی اعزازات بھارت میں سیاسی بحث کا موضوع بن چکے ہیں، جہاں ان کے حامی انہیں بھارت کے بڑھتے ہوئے عالمی اثر و رسوخ کی علامت قرار دیتے ہیں، جبکہ ناقدین انہیں شخصیت پر مبنی سیاست اور سیاسی تشہیر سے جوڑتے ہیں۔