صنعتکار سیاستدانوں پر سیاست چھوڑیں، صنعتی ترقی پر توجہ دیں: مراد علی شاہ

کراچی: وزیراعلیٰ سندھ سید مراد علی شاہ نے صنعتکاروں پر زور دیا ہے کہ وہ سیاست سے دور رہتے ہوئے صنعتی ترقی اور کاروباری سرگرمیوں کے فروغ پر توجہ دیں۔

کورنگی ایسوسی ایشن آف ٹریڈ اینڈ انڈسٹری (کاٹی) کے ایوارڈ اور ڈنر پروگرام سے خطاب کرتے ہوئے مراد علی شاہ نے کہا کہ سندھ حکومت کی جانب سے کورنگی، خصوصاً صنعتی علاقے میں کیے گئے ترقیاتی منصوبوں کو کاٹی نے سراہا ہے۔

وزیراعلیٰ سندھ نے کہا کہ کورنگی کے مختلف علاقوں کی سڑکیں، صنعتی علاقوں کے روڈز اور برجز سندھ حکومت کی ترقیاتی سرگرمیوں کا منہ بولتا ثبوت ہیں۔

انہوں نے بتایا کہ حکومت نے کورنگی میں آٹزم کا شکار بچوں کے لیے اسکول بھی قائم کیا ہے، جبکہ جلد کاٹی کو ایک سنارکل فراہم کیا جائے گا۔ ان کا کہنا تھا کہ ییلو لائن منصوبے کی تعمیر کاٹی کے صنعتکاروں کے مشورے سے کی جائے گی۔

مراد علی شاہ نے کہا کہ کورنگی کے صنعتی علاقے میں امن و امان کی صورتحال بہتر بنانے کے لیے بھی کاٹی کے نمائندوں کی مشاورت سے اقدامات کیے گئے۔ ان کے مطابق کچے کے علاقے میں امن و امان کا مسئلہ حکومت کے لیے باعث تشویش رہا، تاہم سندھ حکومت نے بالآخر وہاں امن بحال کیا۔

وزیراعلیٰ سندھ نے کورنگی کے صنعتی علاقے میں پانی کے مسئلے کو بھی جلد حل کرنے کی یقین دہانی کرائی۔ انہوں نے کہا کہ سندھ حکومت نے کاٹی کو سڑکوں کی تعمیر کے لیے 2 ارب روپے فراہم کیے تھے۔

مراد علی شاہ نے کہا کہ سندھ حکومت پر ترقیاتی منصوبوں میں سست روی کے الزامات عائد کیے جاتے ہیں، تاہم کاٹی کو چھ ماہ قبل 2 ارب روپے فراہم کیے جانے کے باوجود سڑکوں کی تعمیر کا کام شروع نہیں ہو سکا۔

اس موقع پر وزیراعلیٰ سندھ نے کاٹی کے نومنتخب عہدیداروں کو مبارکباد دی اور صنعتکاروں کو مشورہ دیا کہ وہ سیاست کے بجائے صنعتی ترقی پر توجہ دیں۔

انہوں نے کہا کہ صنعتکار سیاستدانوں پر سیاست چھوڑیں اور صنعتی ترقی پر توجہ دیں تاکہ صوبے میں کاروباری سرگرمیوں اور صنعتوں کو مزید فروغ دیا جا سکے۔