امریکا میں نیتن یاہو کو گرفتار نہیں ہونے دیں گے، ٹرمپ کا ظہران ممدانی کو دوٹوک پیغام

واشنگٹن: امریکی صدر ڈونلڈ ٹرمپ نے کہا ہے کہ اسرائیلی وزیراعظم بنیامین نیتن یاہو کو امریکا میں کسی صورت گرفتار نہیں ہونے دیا جائے گا، جبکہ امریکی فوجیوں کے خلاف حملوں پر ایران کو سخت جواب دینے کا بھی عندیہ دیا ہے۔

اپنے بیان میں ٹرمپ نے کہا کہ نیتن یاہو ایران کے خلاف جنگ لڑ رہے ہیں، جبکہ ان کے بقول اصل گرفتاری ایران کے ان رہنماؤں کی ہونی چاہیے جو خونریزی اور تباہی کے ذمہ دار ہیں۔

امریکی صدر نے مزید کہا کہ اردن میں امریکی فوجیوں کی ہلاکت کے بعد ایران کو اس کی کئی گنا قیمت چکانا ہوگی۔ انہوں نے بتایا کہ وزیر دفاع اور عسکری قیادت کو ضروری ہدایات جاری کر دی گئی ہیں اور امریکی افواج ہر ممکن ردعمل کے لیے تیار ہیں۔

ٹرمپ نے زور دیتے ہوئے کہا کہ امریکی فوجیوں کے تحفظ پر کسی قسم کا سمجھوتہ نہیں کیا جائے گا اور ان پر حملوں کا بھرپور جواب دیا جائے گا۔

یہ بیان ایسے وقت میں سامنے آیا ہے جب نیویارک کے میئر ظہران ممدانی نے کہا تھا کہ وہ نیتن یاہو کی نیویارک آمد کی صورت میں ان کی ممکنہ گرفتاری کے قانونی پہلوؤں کا جائزہ لے رہے ہیں۔

ایک انٹرویو میں ظہران ممدانی نے کہا تھا کہ عالمی فوجداری عدالت (ICC) کی جانب سے جنگی جرائم کے الزامات کے بعد نیتن یاہو کا مقام دی ہیگ ہونا چاہیے۔ انہوں نے یہ بھی واضح کیا کہ انہیں اس بات کا یقین نہیں کہ آیا نیویارک پولیس کو کسی غیر ملکی رہنما کی گرفتاری کا حکم دینے کا اختیار ان کے پاس موجود ہے یا نہیں۔

نیتن یاہو رواں سال ستمبر میں اقوام متحدہ کی جنرل اسمبلی کے اجلاس میں شرکت کے لیے نیویارک آنے والے ہیں، جس کے باعث اس معاملے پر سیاسی اور قانونی بحث میں مزید شدت آ سکتی ہے۔