امریکا کا نیا ویزا قانون، 50 ممالک کے شہریوں کیلئے 20 ہزار ڈالر تک ضمانتی بانڈ لازمی

امریکا نے امیگریشن قوانین مزید سخت کرتے ہوئے ویزا بانڈ پروگرام کو مستقل بنانے کا فیصلہ کیا ہے، جس کے تحت مخصوص ممالک کے شہریوں کو امریکی ویزا حاصل کرنے کے لیے 20 ہزار ڈالر تک کا ضمانتی بانڈ جمع کروانا پڑ سکتا ہے۔

غیر ملکی میڈیا رپورٹس کے مطابق نئی پالیسی کاروباری (B-1) اور سیاحتی (B-2) ویزوں پر لاگو ہوگی، جبکہ امریکی حکام کو یہ اختیار حاصل ہوگا کہ وہ ویزا جاری کرنے سے قبل درخواست گزار سے ضمانتی رقم طلب کریں۔

امریکی محکمہ خارجہ کے مطابق 2025 میں شروع کیے گئے پائلٹ پروگرام کے مثبت نتائج سامنے آنے کے بعد اس نظام کو مستقل شکل دی جا رہی ہے۔ حکام کا کہنا ہے کہ ویزا بانڈ پروگرام نے ویزا قوانین پر مؤثر عمل درآمد کو یقینی بنانے میں اہم کردار ادا کیا۔

رپورٹ کے مطابق پہلے مرحلے میں بانڈ کی رقم 5 ہزار، 10 ہزار یا 15 ہزار ڈالر مقرر کی گئی تھی، تاہم نئے قانون کے تحت 5 ہزار ڈالر کا آپشن ختم کر دیا گیا ہے، جبکہ زیادہ سے زیادہ بانڈ کی حد بڑھا کر 20 ہزار ڈالر کر دی گئی ہے۔

امریکی حکام کے مطابق یہ نیا قانون 3 اگست کو فیڈرل رجسٹر میں باضابطہ اشاعت کے بعد نافذ العمل ہوگا۔ پروگرام میں شامل 50 ممالک میں تقریباً 30 افریقی ممالک شامل ہیں، جبکہ دیگر ممالک کے شہری بھی اس پالیسی سے متاثر ہو سکتے ہیں۔

امریکی حکومت کا کہنا ہے کہ اس اقدام کا بنیادی مقصد ایسے افراد کی تعداد کم کرنا ہے جو ویزا کی مدت ختم ہونے کے باوجود غیر قانونی طور پر امریکا میں قیام کرتے ہیں۔ حالیہ برسوں میں امریکا امیگریشن قوانین کو مزید سخت کر رہا ہے، جن میں بعض ویزوں پر اضافی فیسوں کا نفاذ اور درخواست گزاروں کے سوشل میڈیا اکاؤنٹس کی جانچ جیسی نئی شرائط بھی شامل ہیں۔