ایران نے پاکستان کو اسلامی دنیا کا عظیم اثاثہ قرار دے دیا

ایران کے اعلیٰ عہدیدار نے پاکستان کو اسلامی دنیا کا عظیم اثاثہ قرار دیتے ہوئے پاکستان اور ایران کے درمیان برادرانہ اور تزویراتی تعلقات کو مزید مضبوط بنانے پر زور دیا ہے۔

وفاقی وزیر داخلہ محسن نقوی اور ایرانی سپریم نیشنل سکیورٹی کونسل کے سیکرٹری محسن رضائی کے درمیان ملاقات ہوئی، جس میں دوطرفہ تعلقات، علاقائی صورتحال اور مسلم ممالک کے درمیان اتحاد و یکجہتی سمیت باہمی دلچسپی کے امور پر تبادلہ خیال کیا گیا۔

ملاقات کے دوران محسن رضائی نے کہا کہ پاکستان اور ایران ایک دوسرے کے تزویراتی معاون ہیں۔ انہوں نے پاکستانی حکومت، فوج اور عوام کو اسلامی دنیا کا عظیم اثاثہ قرار دیتے ہوئے کہا کہ پاکستانی اور ایرانی عوام کے درمیان محبت دنیا میں بے مثال ہے۔

ایرانی عہدیدار نے مسلم ممالک کے درمیان اتحاد اور یکجہتی کی ضرورت پر زور دیتے ہوئے کہا کہ پاکستان، ایران، ترکیہ، سعودی عرب، مصر اور انڈونیشیا کو مل کر کام کرنا چاہیے تاکہ اسلامی دنیا کے مشترکہ مفادات کو آگے بڑھایا جا سکے۔

اس موقع پر وفاقی وزیر داخلہ محسن نقوی نے کہا کہ پاکستان اور ایران کے تعلقات گزشتہ چند ماہ کے دوران مزید مضبوط ہوئے ہیں۔ انہوں نے دونوں ممالک کے درمیان تعاون کو مزید فروغ دینے اور باہمی روابط کو مستحکم بنانے کے عزم کا اظہار کیا۔