پاکستان کی افغانستان میں فضائی کارروائی، فتنہ الخوارج کے 22 دہشتگرد ہلاک ہونے کا دعویٰ

اسلام آباد: پاکستان نے افغانستان میں دہشتگردوں کے خلاف فضائی کارروائی کرتے ہوئے دو مقامات پر مبینہ دہشتگرد کیمپوں کو نشانہ بنایا ہے۔ وزارت اطلاعات کے مطابق کارروائی آپریشن غضب للحق کے تسلسل میں کی گئی۔

وزارت اطلاعات کے جاری کردہ بیان کے مطابق کارروائی مصدقہ انٹیلی جنس معلومات کی بنیاد پر کی گئی، جبکہ نشانہ بنائے گئے اہداف کو انتہائی درستگی کے ساتھ تباہ کیا گیا۔

بیان میں کہا گیا ہے کہ ابتدائی اطلاعات کے مطابق کارروائی کے نتیجے میں فتنہ الخوارج کے 22 دہشتگرد ہلاک ہوئے ہیں۔

وزارت اطلاعات کا کہنا ہے کہ پاکستان کے شہریوں کی سلامتی اور تحفظ حکومت کی اولین ترجیح ہے۔ بیان کے مطابق پاکستان نے خطے میں امن و استحکام کے لیے ہمیشہ کوششیں کی ہیں۔

حکام کے مطابق کارروائی کا مقصد پاکستان کو درپیش دہشتگردی کے خطرے سے نمٹنا اور دہشتگرد عناصر کے ٹھکانوں کو نشانہ بنانا ہے۔ تاہم، افغانستان میں کارروائی کے حوالے سے مزید تفصیلات اور جانی نقصان کی آزادانہ طور پر تصدیق ہونا باقی ہے۔