پاکستان نے افغانستان میں دہشت گردوں کے خلاف کارروائی پر بھارتی بیان مسترد کر دیا

(اسلام آباد) ترجمان دفتر خارجہ نے افغانستان میں دہشت گرد عناصر کے خلاف پاکستان کی حالیہ کارروائیوں پر بھارتی وزارت خارجہ کے بیان کو سختی سے مسترد کرتے ہوئے اسے بے بنیاد، من گھڑت اور گمراہ کن قرار دیا ہے۔

دفتر خارجہ کی جانب سے جاری بیان میں کہا گیا کہ پاکستان بھارتی الزامات کو یکسر مسترد کرتا ہے اور واضح کرتا ہے کہ افغانستان میں دہشت گرد عناصر کے خلاف کی گئی کارروائیاں ہدفی، متناسب اور بین الاقوامی قوانین کے مطابق اپنے شہریوں کے تحفظ کے لیے کی گئی ہیں۔

بیان کے مطابق یہ کارروائیاں پاکستان میں حالیہ دہشت گرد حملوں کے بعد افغانستان کے صوبوں پکتیا، پکتیکا اور کنڑ میں کی گئیں۔ پاکستانی حکام کے مطابق ان کارروائیوں میں 29 دہشت گرد ہلاک ہوئے، جبکہ وفاقی وزیر اطلاعات عطا تارڑ نے کہا کہ کارروائیوں کے دوران جماعت الاحرار اور فتنہ الخوارج کے مبینہ ٹھکانوں کو نشانہ بنایا گیا اور وہاں موجود اسلحہ و گولہ بارود کا بڑا ذخیرہ بھی تباہ کر دیا گیا۔

ترجمان دفتر خارجہ نے اپنے بیان میں کہا کہ پڑوسی ممالک کی خودمختاری کی خلاف ورزی اور علاقائی استحکام کو نقصان پہنچانے کا بھارتی ریکارڈ عالمی برادری کے سامنے ہے۔ بیان میں یہ بھی کہا گیا کہ بھارت متعدد مواقع پر اقوام متحدہ کے چارٹر کی خلاف ورزی کرتے ہوئے خطے کے امن کو خطرے میں ڈال چکا ہے۔

دفتر خارجہ نے مزید الزام عائد کیا کہ بھارت غیر قانونی طور پر مقبوضہ جموں و کشمیر میں کشمیری عوام کے حقِ خودارادیت کو دبانے کے ساتھ ساتھ افغانستان کی سرزمین سے پاکستان کے خلاف سرگرم دہشت گرد گروہوں کی سرپرستی بھی کر رہا ہے۔

ترجمان کے مطابق بھارت اقوام متحدہ کی سلامتی کونسل کی پابندیوں کی خلاف ورزی کرتے ہوئے خطے میں امن و استحکام کو نقصان پہنچانے والا کردار ادا کر رہا ہے، اس لیے اس کے الزامات اور بیانات کو حقائق کے تناظر میں دیکھا جانا چاہیے۔

بیان کے اختتام پر پاکستان نے اس عزم کا اعادہ کیا کہ وہ اپنے شہریوں کے جان و مال کے تحفظ اور قومی سلامتی کو یقینی بنانے کے لیے بین الاقوامی قوانین کے مطابق ضروری اقدامات جاری رکھے گا۔