خطے میں بڑھتی کشیدگی پر پاکستان کا اظہارِ تشویش، تحمل اور سفارت کاری پر زور

(اسلام آباد) پاکستان نے خطے میں بڑھتی ہوئی کشیدگی پر گہری تشویش کا اظہار کرتے ہوئے کہا ہے کہ تنازع کا دوبارہ آغاز کسی بھی فریق کے مفاد میں نہیں اور تمام مسائل کا حل تحمل، مذاکرات اور سفارت کاری میں مضمر ہے۔

دفتر خارجہ کی جانب سے جاری اعلامیے میں کہا گیا ہے کہ پاکستان تمام متعلقہ فریقوں پر زور دیتا ہے کہ وہ تحمل کا مظاہرہ کریں اور ایسے اقدامات سے گریز کریں جو خطے کے امن، سلامتی اور استحکام کو مزید نقصان پہنچا سکتے ہیں۔

اعلامیے کے مطابق خطے میں پائیدار اور مشترکہ امن کے حصول کے لیے مسلسل رابطے، بامعنی مذاکرات اور مؤثر سفارت کاری کا کوئی متبادل موجود نہیں۔

دفتر خارجہ نے تمام فریقوں سے مطالبہ کیا کہ وہ اسلام آباد مفاہمتی یادداشت کے تحت کیے گئے اپنے وعدوں اور ذمہ داریوں کی پاسداری کریں، جو باہمی احترام، افہام و تفہیم اور خطے سمیت دنیا میں مشترکہ امن و خوشحالی کے فروغ کے لیے ایک مضبوط بنیاد فراہم کرتی ہے۔

اعلامیے میں مزید کہا گیا کہ پاکستان خطے میں امن، استحکام اور تنازعات کے پرامن حل کے لیے اپنا مثبت اور تعمیری کردار جاری رکھنے کے لیے تیار ہے۔