نیویارک سٹی ہال میں پہلی بار پاکستان کے یومِ آزادی کی تاریخی تقریب

نیویارک: پاکستان کے یومِ آزادی کے سلسلے میں پہلی بار نیویارک سٹی ہال کے اندر خصوصی تقریب کا انعقاد کیا گیا، جس میں پاکستانی امریکی کمیونٹی، منتخب نمائندوں، ارکانِ پارلیمنٹ اور میڈیا سے وابستہ شخصیات نے بڑی تعداد میں شرکت کی۔

تقریب کا اہتمام نیویارک سٹی کونسل کی اسپیکر جولی مینن، کونسل ممبر اور امریکن پاکستانی ایڈووکیسی گروپ (APAG) نے مشترکہ طور پر کیا۔

قونصل جنرل پاکستان نیویارک عامر احمد آتوزئی نے تقریب سے خطاب کرتے ہوئے اسے پاکستانی امریکی برادری کے لیے قابلِ فخر اور یادگار موقع قرار دیا۔ انہوں نے کہا کہ نیویارک سٹی ہال میں پاکستان کے یومِ آزادی کی تقریب کا انعقاد دونوں ممالک کے درمیان مضبوط تعلقات اور پاکستانی کمیونٹی کی اہمیت کی عکاسی کرتا ہے۔

اس موقع پر نیویارک سٹی کونسل کی اسپیکر جولی مینن نے نیویارک کی ترقی میں پاکستانی امریکی کمیونٹی کے کردار کو سراہا۔ انہوں نے کہا کہ پاکستانی امریکی برادری پاکستان اور امریکا کے درمیان مضبوط پل کا کردار ادا کر رہی ہے۔

تقریب میں پاکستانی امریکی کمیونٹی کی سماجی، معاشی اور شہری شعبوں میں خدمات کو بھی اجاگر کیا گیا۔ مقررین نے نیویارک کی زندگی میں پاکستانی نژاد امریکیوں کے بڑھتے ہوئے مثبت کردار کو سراہتے ہوئے ان کی خدمات کو قابلِ قدر قرار دیا۔

نیویارک سٹی ہال میں ہونے والی یہ تقریب پاکستانی امریکی کمیونٹی کے لیے ایک اہم سنگِ میل قرار دی جا رہی ہے، جس نے نیویارک کے شہری اور سماجی منظرنامے میں پاکستانی کمیونٹی کی بڑھتی ہوئی اہمیت کو نمایاں کیا۔