پاکستان، سری لنکا اور انگلینڈ کی سیریز: میچ آفیشلز کے ناموں کا اعلان

لاہور: پاکستان کرکٹ بورڈ (پی سی بی) نے پاکستان اور سری لنکا کے درمیان ٹی ٹوئنٹی اور ٹیسٹ سیریز جبکہ پاکستان، انگلینڈ اور سری لنکا پر مشتمل ون ڈے ٹرائی سیریز کے لیے میچ آفیشلز کے پینل کا اعلان کردیا۔

ون ڈے ٹرائی سیریز کے آفیشلز

ون ڈے ٹرائی سیریز میں آئی سی سی ایلیٹ پینل کے میچ ریفری جیف کرو ذمہ داریاں انجام دیں گے۔ امپائرز کے پینل میں آئی سی سی ایلیٹ پینل کے احسن رضا اور شرفدولہ کے علاوہ آصف یعقوب، راشد ریاض، فیصل آفریدی اور ناصر حسین شامل ہیں۔

نیوزی لینڈ کے امپائر وین نائٹس بھی ٹرائی سیریز میں امپائرنگ کے فرائض انجام دیں گے۔

ٹرائی سیریز کے فائنل میں احسن رضا اور وین نائٹس آن فیلڈ امپائرز جبکہ شرفدولہ تھرڈ امپائر ہوں گے۔ شرفدولہ اور وین نائٹس ٹرائی سیریز میں بالترتیب چار اور تین میچز میں تھرڈ امپائر کی ذمہ داریاں بھی نبھائیں گے۔

ٹیسٹ سیریز کے میچ آفیشلز

پاکستان اور سری لنکا کے درمیان ٹیسٹ سیریز کے لیے انگلینڈ سے تعلق رکھنے والے آئی سی سی ایمرجنگ ریفری ڈین کوسکر کو میچ ریفری مقرر کیا گیا ہے۔ وہ راولپنڈی میں بطور ٹیسٹ ریفری اپنا ڈیبیو کریں گے۔

آئی سی سی ایلیٹ پینل کے امپائرز روڈ ٹکر، ایڈرین ہولڈسٹاک اور الاہودین پالیکر ٹیسٹ سیریز میں آن فیلڈ امپائر کی ذمہ داریاں انجام دیں گے۔

پالیکر اور روڈ ٹکر پہلے اور دوسرے ٹیسٹ میں بالترتیب تھرڈ امپائر ہوں گے۔

ٹی ٹوئنٹی سیریز کے لیے بھی آفیشلز مقرر

پاکستان اور سری لنکا کے درمیان ٹی ٹوئنٹی سیریز کے لیے آئی سی سی انٹرنیشنل پینل میچ ریفریز سے تعلق رکھنے والے علی نقوی کو میچ ریفری مقرر کیا گیا ہے۔

راشد ریاض، ناصر حسین اور فیصل آفریدی ٹی ٹوئنٹی سیریز میں آن فیلڈ اور تھرڈ امپائر کی ذمہ داریاں نبھائیں گے، جبکہ طارق رشید تینوں ٹی ٹوئنٹی میچز میں فورتھ امپائر ہوں گے۔

سیریز کا شیڈول

پاکستان اور سری لنکا کے درمیان تین ٹی ٹوئنٹی میچز 9، 11 اور 13 اکتوبر کو راولپنڈی میں کھیلے جائیں گے۔

پاکستان، انگلینڈ اور سری لنکا کی ون ڈے ٹرائی سیریز 18 سے 31 اکتوبر تک راولپنڈی اور لاہور میں ہوگی۔

اس کے بعد پاکستان اور سری لنکا کے درمیان دو ٹیسٹ میچز 9 سے 21 نومبر تک راولپنڈی اور لاہور میں کھیلے جائیں گے۔