بانی پی ٹی آئی کے طبی معائنے سے متعلق پمز انتظامیہ کا اعلامیہ جاری

اسلام آباد: بانی پی ٹی آئی عمران خان کے طبی معائنے سے متعلق پمز انتظامیہ نے اعلامیہ جاری کردیا ہے، جس میں کہا گیا ہے کہ مریض کی رازداری اور سپریم کورٹ کی ہدایات کا مکمل احترام کیا جائے گا۔

پمز انتظامیہ کے اعلامیے کے مطابق عمران خان کی طبی رپورٹ کے خفیہ مندرجات ظاہر نہیں کیے جائیں گے۔ بانی پی ٹی آئی کو 20 اور 21 اگست کی درمیانی شب پمز اسپتال لایا گیا، جہاں شفا انٹرنیشنل اسپتال کے 2 ماہر ڈاکٹروں نے ان کے آنکھوں کے معائنے میں حصہ لیا۔

اعلامیے میں بتایا گیا ہے کہ عمران خان کے دیگر طبی معائنے پمز کے متعلقہ ماہرین نے کیے، جبکہ آنکھوں کے معائنے سے حاصل ہونے والی طبی رائے کو مجموعی طبی جائزے میں شامل کرلیا گیا۔

پمز انتظامیہ کے مطابق میڈیکل بورڈ نے تمام طبی نتائج کو یکجا کرکے فٹنس رپورٹ مرتب کرلی ہے۔

اعلامیے میں واضح کیا گیا ہے کہ مریض کی رازداری برقرار رکھی جائے گی اور طبی رپورٹ میں شامل خفیہ معلومات کو ظاہر نہیں کیا جائے گا۔ پمز انتظامیہ نے کہا کہ اس معاملے میں سپریم کورٹ کی ہدایات پر بھی مکمل عملدرآمد کیا جائے گا۔