مہاجرین نشستوں کا خاتمہ جائز مطالبہ ہے، احتجاج نہیں سیاسی جدوجہد ہونی چاہیے: وزیراعظم آزادکشمیر

(مظفرآباد) وزیراعظم آزادکشمیر فیصل ممتاز راٹھور نے کہا ہے کہ مہاجرین کی نشستوں کے خاتمے کا مطالبہ کوئی شکوہ یا گلہ نہیں بلکہ ایک جائز اور بامعنی سیاسی مطالبہ ہے، جس پر سنجیدہ بحث کی ضرورت ہے۔

اپنے بیان میں وزیراعظم آزادکشمیر نے کہا کہ مہاجرین کی نشستوں کے معاملے پر گفتگو کے لیے موزوں ترین فورم قانون ساز اسمبلی ہے، جہاں اس مسئلے پر تفصیلی اور جمہوری انداز میں بحث ہونی چاہیے۔

انہوں نے کہا کہ سیاسی حقوق کے حصول کا بہترین راستہ سیاسی جدوجہد ہے، نہ کہ احتجاج یا ہنگامہ آرائی۔ ان کے مطابق جمہوری عمل کے ذریعے ہی مسائل کا پائیدار حل نکالا جا سکتا ہے۔

فیصل ممتاز راٹھور کا کہنا تھا کہ مہاجرین نشستوں کی موجودہ حیثیت قابلِ قبول نہیں، اس حوالے سے نظرثانی کی ضرورت ہے تاکہ نظام کو مزید منصفانہ اور متوازن بنایا جا سکے۔

انہوں نے مزید کہا کہ اس معاملے پر ہر فریق کو اپنی رائے جمہوری اور آئینی دائرے میں رہتے ہوئے پیش کرنی چاہیے تاکہ ایک متفقہ اور دیرپا حل تک پہنچا جا سکے۔