مسلم لیگ (ن) کے رکن قومی اسمبلی محمود بشیر ورک انتقال کر گئے

مسلم لیگ ن کے سینئر رہنما اور رکن قومی اسمبلی محمود بشیر ورک 89 برس کی عمر میں انتقال کر گئے۔ اہلخانہ کے مطابق وہ کچھ عرصے سے کینسر کے مرض میں مبتلا تھے اور لاہور کے ایک اسپتال میں زیرِ علاج تھے۔

محمود بشیر ورک کی نمازِ جنازہ آج صبح ادا کی گئی، جس کے بعد انہیں آبائی قبرستان میں سپردِ خاک کر دیا گیا۔ ان کے انتقال پر مسلم لیگ ن سمیت مختلف سیاسی جماعتوں کے رہنماؤں نے گہرے دکھ اور افسوس کا اظہار کرتے ہوئے اہلخانہ سے تعزیت کی ہے۔

محمود بشیر ورک ملکی سیاست میں طویل عرصے تک فعال رہے اور مسلم لیگ ن کے سینئر ترین رہنماؤں میں شمار ہوتے تھے۔ وہ وفاقی وزیر قانون و انصاف کی ذمہ داریاں بھی انجام دے چکے تھے۔

اپنے سیاسی کیریئر کے دوران محمود بشیر ورک 5 مرتبہ رکن قومی اسمبلی منتخب ہوئے۔ 2024 کے عام انتخابات میں انہوں نے مسلم لیگ ن کے ٹکٹ پر قومی اسمبلی کے حلقہ این اے-77 گوجرانوالہ ون سے ایک لاکھ 9 ہزار 704 ووٹ حاصل کرکے کامیابی حاصل کی تھی۔ ان کے مقابلے میں آزاد امیدوار راشدہ طارق نے 91 ہزار 825 جبکہ پیپلز پارٹی کے امیدوار امتیاز صفدر وڑائچ نے 17 ہزار 59 ووٹ حاصل کیے تھے۔