سندھ میں پولیو کے خلاف بڑی کامیابی، 17 ماحولیاتی نمونے منفی قرار

(اسلام آباد) وفاقی وزیر صحت مصطفیٰ کمال نے کہا ہے کہ سندھ میں پولیو وائرس کے خاتمے کی کوششوں میں اہم پیش رفت سامنے آئی ہے، جہاں ماحولیاتی نمونوں کے نتائج میں نمایاں بہتری ریکارڈ کی گئی ہے۔

انہوں نے بتایا کہ حالیہ تجزیے کے مطابق مجموعی طور پر 29 میں سے 28 ماحولیاتی نمونے منفی آئے ہیں، جو اگست 2023 کے بعد منفی نمونوں کی سب سے زیادہ تعداد ہے۔

وفاقی وزیر کے مطابق کراچی ڈویژن میں بھی پولیو وائرس کی گردش میں واضح کمی دیکھی گئی ہے، جہاں 12 میں سے 11 ماحولیاتی نمونے پہلی مرتبہ منفی رپورٹ ہوئے ہیں۔

انہوں نے مزید بتایا کہ سندھ کے دیگر ڈویژنز میں پہلی بار تمام 17 ماحولیاتی نمونے منفی آئے ہیں، جو انسدادِ پولیو حکمت عملی کی کامیابی اور وائرس کے پھیلاؤ میں نمایاں کمی کا ثبوت ہے۔

مصطفیٰ کمال نے کہا کہ قمبر اور کشمور میں طویل عرصے بعد پولیو وائرس کی گردش کا خاتمہ خوش آئند پیش رفت ہے، جبکہ بدین اور میرپورخاص میں مسلسل دوسرے ماہ بھی ماحولیاتی نمونے منفی آنا اہم کامیابی قرار دیا جا سکتا ہے۔

انہوں نے کہا کہ حکومت پولیو وائرس کے مکمل خاتمے کے لیے تمام دستیاب وسائل بروئے کار لا رہی ہے اور ہر بچے کو اس موذی مرض سے محفوظ رکھنا اولین ترجیح ہے۔

وفاقی وزیر صحت نے اعلان کیا کہ جولائی 2026 کے دوران کراچی میں خصوصی انسدادِ پولیو مہم چلائی جائے گی تاکہ وائرس کی منتقلی کو مکمل طور پر روکا جا سکے اور پولیو فری پاکستان کے ہدف کو جلد از جلد حاصل کیا جا سکے۔