2026 کے طاقتور ترین پاسپورٹس کی فہرست جاری، سنگاپور پہلے نمبر پر، پاکستان 100ویں نمبر پر

اسلام آباد: دنیا بھر کے طاقتور ترین پاسپورٹس کی تازہ ترین عالمی درجہ بندی جاری کر دی گئی ہے، جس میں ایک بار پھر ایشیائی ممالک نے نمایاں برتری حاصل کر لی ہے، جبکہ پاکستان کمزور ترین پاسپورٹس والے ممالک میں شامل رہا۔

بین الاقوامی ادارے ہینلے اینڈ پارٹنرز کی جانب سے جولائی تا دسمبر 2026 کے لیے جاری کردہ Henley Passport Index کے مطابق سنگاپور مسلسل دنیا کا طاقتور ترین پاسپورٹ برقرار رکھنے میں کامیاب رہا ہے۔ سنگاپور کے شہری دنیا کے 192 ممالک میں بغیر ویزا یا ویزا آن ارائیول کی سہولت کے ساتھ سفر کر سکتے ہیں۔

فہرست کے مطابق متحدہ عرب امارات، جاپان اور جنوبی کوریا مشترکہ طور پر دوسرے نمبر پر ہیں، جہاں کے پاسپورٹ رکھنے والے افراد 188 ممالک میں ویزا فری یا آسان سفری رسائی رکھتے ہیں۔

تیسرے نمبر پر سویڈن رہا، جس کے شہری 187 ممالک میں ویزا فری سفر کر سکتے ہیں۔

چوتھے نمبر پر بیلجیئم، ڈنمارک، فن لینڈ، فرانس، جرمنی، آئرلینڈ، اٹلی، لکسمبرگ، نیدرلینڈز، ناروے اور اسپین شامل ہیں، جن کے پاسپورٹس کے ذریعے 186 ممالک میں ویزا فری رسائی ممکن ہے۔

پانچویں نمبر پر یونان، آسٹریا، مالٹا، پرتگال اور سوئٹزر لینڈ کے پاسپورٹس رہے، جن کے حامل افراد 185 ممالک میں بغیر ویزا سفر کر سکتے ہیں۔

امریکی پاسپورٹ کی درجہ بندی میں کمی

رپورٹ کے مطابق امریکا کا پاسپورٹ اس مرتبہ 10ویں نمبر پر پہنچ گیا ہے، حالانکہ ماضی میں اسے دنیا کے طاقتور ترین پاسپورٹس میں شمار کیا جاتا تھا۔

متحدہ عرب امارات کی شاندار پیش رفت

ہینلے اینڈ پارٹنرز کے مطابق گزشتہ ایک دہائی کے دوران متحدہ عرب امارات نے سب سے نمایاں ترقی کی۔ یو اے ای کے پاسپورٹ کی عالمی رینکنگ میں 40 درجے بہتری آئی، جس کے بعد وہ دنیا کے دوسرے طاقتور ترین پاسپورٹس میں شامل ہو گیا۔

پاکستان کمزور ترین پاسپورٹس میں شامل

رپورٹ کے مطابق پاکستان کا پاسپورٹ دنیا کے کمزور ترین پاسپورٹس میں چوتھے نمبر پر ہے۔ مجموعی عالمی درجہ بندی میں پاکستان 100ویں نمبر پر موجود ہے، جبکہ پاکستانی شہری 30 ممالک میں ویزا فری یا آسان سفری سہولت سے فائدہ اٹھا سکتے ہیں۔

پاکستان سے نیچے صرف عراق (101)، شام (102) اور افغانستان (103) موجود ہیں۔

دوسری جانب پاکستان سے اوپر یمن (99)، صومالیہ (98)، نیپال (97)، شمالی کوریا اور بنگلا دیش (96)، فلسطین اور ایران (95)، اریٹیریا (94)، جبکہ سری لنکا اور لیبیا (93) ویں نمبر پر رہے۔

ماہرین کے مطابق پاسپورٹ کی عالمی درجہ بندی کسی ملک کے شہریوں کو حاصل ویزا فری یا ویزا آن ارائیول رسائی کی بنیاد پر مرتب کی جاتی ہے، جو بین الاقوامی سفارتی تعلقات اور سفری آزادی کا اہم اشاریہ سمجھی جاتی ہے۔