راولپنڈی اسلام آباد میں موسلادھار بارش، نالہ لئی میں طغیانی، خطرے کے سائرن بج گئے

اسلام آباد/راولپنڈی: راولپنڈی اور اسلام آباد میں موسلادھار بارش کے باعث نالہ لئی میں طغیانی آگئی، جس کے بعد انتظامیہ نے اطراف کی آبادیوں کو محتاط رہنے اور محفوظ مقامات پر منتقل ہونے کی ہدایات جاری کر دیں۔

نالہ لئی کے کٹاریاں کے مقام پر پانی کی سطح 22 فٹ سے تجاوز کرگئی، جس کے بعد خطرے کے سائرن بجا دیے گئے۔ انتظامیہ کی جانب سے نالہ لئی کے اطراف رہائش پذیر شہریوں کو احتیاطی تدابیر اختیار کرنے اور محفوظ مقامات پر رہنے کی ہدایت کی گئی ہے۔

اسلام آباد کے علاقے سیدپور میں سب سے زیادہ 66 ملی میٹر بارش ریکارڈ کی گئی۔ شدید بارش کے باعث شہر کے مختلف علاقوں میں سڑکوں پر پانی جمع ہوگیا، جبکہ ایف سیون، ایف ایٹ اور کھنہ ایسٹ سمیت متعدد علاقوں میں شہریوں کو آمدورفت میں مشکلات کا سامنا ہے۔

واسا کی ٹیمیں اور بھاری مشینری نالہ لئی سمیت نشیبی علاقوں میں موجود ہیں اور پانی کی نکاسی کے لیے اقدامات کیے جا رہے ہیں۔ نارووال اور منڈی بہاؤالدین میں بھی بارش کے باعث نشیبی علاقوں میں پانی جمع ہونے کی اطلاعات ہیں۔

میٹرو بس سروس بھی متاثر

موسلادھار بارش کے باعث میٹرو بس کی چھت بھی ٹپکنے لگی، جس سے مسافروں کو مشکلات کا سامنا کرنا پڑا۔ بس کے اندر چھت سے پانی ٹپک کر نشستوں پر جمع ہوگیا۔

محکمہ موسمیات نے جمعے تک بالائی اور وسطی علاقوں میں مزید بارشوں کا الرٹ جاری کیا ہے، جس کے باعث شہریوں کو احتیاط برتنے کی ہدایت کی گئی ہے۔

دوسری جانب دریائے سندھ کے کالا باغ، چشمہ، تونسہ اور گڈو بیراج پر نچلے درجے کے سیلاب کی صورتحال ہے، جبکہ ملک کے دیگر دریاؤں میں پانی کی صورتحال معمول کے مطابق بتائی گئی ہے۔