سفیرِ پاکستان کی امریکی سویا بین ایکسپورٹ کونسل کے سی ای او سے اہم ملاقات، اقتصادی تعاون بڑھانے پر اتفاق

شکاگو: سفیرِ پاکستان رضوان سعید شیخ نے شکاگو میں منعقدہ یو ایس کنیکٹ کانفرنس کے موقع پر امریکی سویا بین ایکسپورٹ کونسل کے چیف ایگزیکٹو آفیسر جم سٹر سے اہم ملاقات کی، جس میں پاک امریکا اقتصادی تعاون، تجارت اور سرمایہ کاری کے فروغ سمیت سویا بین کے شعبے میں باہمی اشتراک پر تبادلہ خیال کیا گیا۔

ملاقات کے دوران سفیرِ پاکستان نے پاک امریکا بڑھتے ہوئے اقتصادی تعاون اور تجارت و سرمایہ کاری میں ہونے والی مثبت پیش رفت پر اطمینان کا اظہار کیا۔

رضوان سعید شیخ نے کہا کہ پاکستان مختصر عرصے میں امریکی سویا بین درآمد کرنے والے دنیا کے بڑے ممالک میں شامل ہو گیا ہے۔ پاکستان سالانہ 10 لاکھ میٹرک ٹن سے زائد امریکی سویا بین درآمد کر رہا ہے اور امریکی سویا بین کی عالمی برآمدی منڈی میں ایک نمایاں درآمد کنندہ بن چکا ہے۔

انہوں نے کہا کہ سویا بین ویلیو چین میں پاکستان اور امریکا کے درمیان تعاون بڑھانے کے وسیع امکانات موجود ہیں، جس سے دونوں ممالک کے درمیان اقتصادی شراکت داری کو مزید مستحکم کیا جا سکتا ہے۔

اس موقع پر امریکی سویا بین ایکسپورٹ کونسل کے سی ای او جم سٹر نے پاکستان کے ساتھ دیرینہ تعاون اور شراکت داری جاری رکھنے کے عزم کا اعادہ کیا۔ انہوں نے بتایا کہ کونسل پاکستان میں تکنیکی معاونت، تربیت اور استعدادِ کار بڑھانے کے مختلف پروگرام جاری رکھے ہوئے ہے۔

ملاقات میں پاکستان کے فیڈ، پولٹری، ڈیری اور فوڈ پروسیسنگ شعبوں کی پائیدار ترقی کے لیے تعاون جاری رکھنے پر بھی اتفاق کیا گیا۔

فریقین نے پاک امریکا اقتصادی شراکت داری کے تحت سویا بین کے شعبے میں تعاون مزید بڑھانے اور باہمی تجارت و سرمایہ کاری کے نئے مواقع تلاش کرنے پر اتفاق کیا۔