بھارتی ریئلٹی شو میں سجاد علی کا گیت راوی پیش، سوشل میڈیا پر کریڈٹ اور حقوق سے متعلق بحث

بھارتی ریئلٹی شو میں پاکستانی گلوکار سجاد علی کا مقبول گیت ’’راوی‘‘ پیش کیے جانے کے بعد سوشل میڈیا پر مختلف آراء اور تبصروں کا سلسلہ شروع ہوگیا۔

سجاد علی ایک بار پھر خبروں کی زینت بن گئے، تاہم اس مرتبہ وجہ ان کا کوئی نیا گانا نہیں بلکہ بھارتی ریئلٹی شو میں ان کے معروف گیت ’’راوی‘‘ کی پرفارمنس ہے، جس نے دونوں ممالک کے موسیقی شائقین کی توجہ اپنی جانب مبذول کرالی۔

پرفارمنس کے بعد سوشل میڈیا صارفین کی جانب سے گانے کے استعمال، کاپی رائٹ، لائسنسنگ اور سجاد علی کو مناسب کریڈٹ دیے جانے کے حوالے سے مختلف سوالات اٹھائے جا رہے ہیں۔ بعض صارفین نے گیت کی بین الاقوامی مقبولیت کو سراہا، جبکہ دیگر نے اس کے استعمال سے متعلق وضاحت کا مطالبہ کیا۔

سجاد علی کا گیت ’’راوی‘‘ پاکستان سمیت دنیا بھر میں بے حد مقبول ہے اور اسے ان کے کامیاب ترین گانوں میں شمار کیا جاتا ہے۔ مداحوں کا کہنا ہے کہ اس گیت کی عالمی سطح پر پذیرائی پاکستانی موسیقی کی مقبولیت کا ثبوت ہے۔

اسی ریئلٹی شو میں ایک اور خاتون امیدوار نے پاکستانی گلوکار عاصم اظہر کا معروف گانا ’’میری زندگی ہے تو‘‘ بھی پیش کیا، جس کے بعد پاکستانی صارفین نے اس پرفارمنس پر بھی دلچسپی کا اظہار کیا اور سوشل میڈیا پر اس حوالے سے تبصرے سامنے آنے لگے۔