پاکستانی اور کشمیری یک جان اور دو قالب ہیں، رانا محمد قاسم نون

واشنگٹن ڈی سی میں سفارت خانہ پاکستان میں چیئرمین پارلیمانی کمیٹی برائے کشمیر رانا محمد قاسم نون نے ذرائع ابلاغ کے نمائندوں سے ملاقات اور پریس بریفنگ کی۔ اس موقع پر انہوں نے کہا کہ پاکستانی اور کشمیری یک جان اور دو قالب ہیں، پاکستان کشمیری عوام کی اخلاقی، سفارتی اور سیاسی حمایت سے کبھی پیچھے نہیں ہٹے گا۔

رانا محمد قاسم نون نے کہا کہ وزیراعظم شہباز شریف نے اقوام متحدہ کی جنرل اسمبلی کے 81ویں اجلاس میں مسئلہ کشمیر پر پاکستان کا مؤقف واضح الفاظ میں عالمی برادری کے سامنے پیش کیا، جبکہ او آئی سی کے رابطہ گروپ میں شامل رکن ممالک نے بھی مسئلہ کشمیر پر پاکستان کے مؤقف کی بھرپور تائید کی۔

انہوں نے کہا کہ کشمیر ایک بین الاقوامی مسئلہ ہے جس کا حل اقوام متحدہ کی متعلقہ قراردادوں پر عمل درآمد کے ذریعے ہی ممکن ہے۔ جنوبی ایشیا میں پائیدار امن و سلامتی کے لیے مسئلہ کشمیر کا منصفانہ حل اور کشمیری عوام کے حق خودارادیت کو یقینی بنانا ضروری ہے۔

چیئرمین کشمیر کمیٹی نے کہا کہ معرکۂ حق میں پاکستان کی کامیابی نے دنیا کے سامنے مسئلہ کشمیر کی اہمیت کو مزید اجاگر کیا ہے۔ ان کے مطابق تنازع کشمیر کا دیرپا اور پائیدار حل عالمی برادری کی توجہ کا متقاضی ہے۔

اس موقع پر سفیر پاکستان رضوان سعید شیخ نے کہا کہ مقبوضہ کشمیر گزشتہ آٹھ دہائیوں سے بھارتی ظلم و جبر کا شکار ہے اور کشمیری شہدا کی قربانیوں کو فراموش نہیں کیا جا سکتا۔ انہوں نے کہا کہ تنازع کشمیر کی حل طلب حیثیت بین الاقوامی قوانین اور سلامتی کونسل کی قراردادوں کی روشنی میں مسلمہ ہے۔

رضوان سعید شیخ کا کہنا تھا کہ مسئلہ کشمیر پر قانون، تاریخ، جغرافیہ، مذہب اور معاشرت کے شواہد پاکستان اور کشمیری عوام کے مؤقف کی اہمیت کو اجاگر کرتے ہیں۔ انہوں نے اس بات پر بھی زور دیا کہ معاشی اور سیاسی شعبوں پر توجہ اور مسلسل محنت کامیابی کے لیے ناگزیر ہے۔

رانا محمد قاسم نون نے بتایا کہ اقوام متحدہ کی جنرل اسمبلی کے 81ویں اجلاس میں شرکت کے بعد واشنگٹن کے دورے کا مقصد عالمی برادری کی توجہ مسئلہ کشمیر کے دیرپا اور پائیدار حل کی جانب مبذول کرانا ہے۔