بالٹی مور میں سیرت النبی ﷺ کانفرنس، حامد سعید کاظمی کا خصوصی خطاب

بالٹی مور، میری لینڈ: امریکی ریاست میری لینڈ کے شہر بالٹی مور میں سیرت النبی ﷺ کے حوالے سے ایک روح پرور اور بابرکت کانفرنس کا انعقاد کیا گیا، جس میں پاکستانی و مسلم کمیونٹی کے افراد نے بڑی تعداد میں شرکت کی۔

تقریب میں پاکستان کے سابق وفاقی وزیر مذہبی امور حامد سعید کاظمی نے بطور مہمانِ خصوصی شرکت کی۔ کانفرنس میں علماء کرام، نعت خواں حضرات، کمیونٹی رہنماؤں اور مختلف شعبہ ہائے زندگی سے تعلق رکھنے والے افراد بھی شریک ہوئے۔

تقریب کا آغاز تلاوتِ کلامِ پاک سے ہوا، جس کے بعد نعت خواں حضرات نے بارگاہِ رسالت ﷺ میں عقیدت کے پھول نچھاور کیے۔ اس موقع پر حامد سعید کاظمی نے نبی اکرم حضرت محمد مصطفیٰ ﷺ کی سیرتِ طیبہ، شانِ اقدس اور انسانیت کے لیے آپ ﷺ کی رحمت و شفقت پر تفصیلی خطاب کیا۔

حامد سعید کاظمی نے کہا کہ انسان کے لیے سب سے پہلے اپنے رب کو پہچاننا ضروری ہے، اللہ تعالیٰ ہی پوری کائنات کا خالق، مالک اور رازق ہے۔ انہوں نے کہا کہ نبی اکرم ﷺ کی سیرتِ طیبہ انسانیت کے لیے ہدایت، محبت، اخلاق، عدل، برداشت اور رحمت کا کامل نمونہ ہے۔

انہوں نے زور دیا کہ مسلمانوں کو چاہیے کہ وہ نبی اکرم ﷺ کی تعلیمات کو اپنی عملی زندگی کا حصہ بنائیں اور سیرتِ مبارکہ کو سمجھنے اور اس پر عمل کرنے کی کوشش کریں۔ ان کا کہنا تھا کہ آج کے دور میں محبت، اخوت، برداشت اور باہمی احترام کی پہلے سے زیادہ ضرورت ہے اور سیرت النبی ﷺ ان اعلیٰ انسانی اقدار کی رہنمائی فراہم کرتی ہے۔

کانفرنس کے اختتام پر امتِ مسلمہ، پاکستان، امریکہ اور پوری انسانیت، خصوصاً پاکستان کی سلامتی، خوشحالی اور امن کے لیے خصوصی دعا کی گئی۔ شرکاء نے سیرت النبی ﷺ کی اس بابرکت محفل کو سراہتے ہوئے کہا کہ امریکہ میں ایسی تقریبات نئی نسل کو اسلامی تعلیمات اور سیرتِ رسول ﷺ سے جوڑنے میں اہم کردار ادا کرتی ہیں۔