بلوچستان میں سکیورٹی فورسز کی کارروائیاں، 96 گھنٹوں میں 71 سے زائد دہشتگرد ہلاک: آئی ایس پی آر

کوئٹہ:پاک فوج کے شعبہ تعلقات عامہ (آئی ایس پی آر) کے مطابق بلوچستان میں گزشتہ 96 گھنٹوں کے دوران مختلف کارروائیوں میں 71 سے زائد دہشتگرد ہلاک کیے گئے ہیں۔

آئی ایس پی آر کے مطابق گزشتہ 72 گھنٹوں میں 23 دہشتگرد ہلاک ہوئے، جبکہ 25 ستمبر کو نوشکی میں خفیہ اطلاعات کی بنیاد پر کیے گئے آپریشن میں 11 دہشتگرد مارے گئے۔

آئی ایس پی آر کا کہنا ہے کہ آپریشن شعبان میں اب تک 33 دہشتگرد ہلاک کیے جاچکے ہیں۔ سکیورٹی فورسز نے متعدد دہشتگردوں کے ٹھکانے کلیئر کیے جبکہ کارروائیوں کے دوران اسلحہ، گولہ بارود اور دھماکہ خیز مواد بھی برآمد کیا گیا۔

مزید بتایا گیا ہے کہ مند میں کارروائی کے دوران 6 دہشتگرد ہلاک کیے گئے اور وسیع علاقے کو کلیئر کرلیا گیا۔ نوشکی میں دہشتگردوں کے ٹھکانے سے بھی بڑی تعداد میں اسلحہ برآمد کیا گیا۔

آئی ایس پی آر کے مطابق آپریشن شعبان اور بلوچستان کے دیگر علاقوں میں کارروائیوں سے بھارتی حمایت یافتہ افغان پراکسیز کو نقصان پہنچا ہے۔ سکیورٹی فورسز اور قانون نافذ کرنے والے ادارے دہشتگردی کے خاتمے کے لیے کارروائیاں جاری رکھے ہوئے ہیں۔

دوسری جانب وفاقی وزیر داخلہ محسن نقوی نے بلوچستان میں کامیاب کارروائیوں پر سکیورٹی فورسز کو خراج تحسین پیش کیا ہے۔ ان کا کہنا ہے کہ سکیورٹی فورسز نے دہشتگردوں کے مذموم عزائم ناکام بنائے اور دہشتگردی کے مکمل خاتمے تک کارروائیاں جاری رہیں گی۔