مڈٹرم انتخابات کے بعد ایران پر دوبارہ بمباری کر سکتا ہوں: ٹرمپ

واشنگٹن: امریکی صدر ڈونلڈ ٹرمپ نے ایران کے خلاف دوبارہ فوجی کارروائی کے امکان کا عندیہ دیتے ہوئے کہا ہے کہ مڈٹرم انتخابات کے بعد ایران پر ایک مرتبہ پھر بمباری کی جا سکتی ہے۔

وائٹ ہاؤس میں صحافیوں سے گفتگو کرتے ہوئے ٹرمپ نے ایران کی جانب سے آبنائے ہرمز کو سات روز کے اندر تجارتی جہاز رانی کے لیے کھولنے کی تجویز بھی مسترد کردی۔

ٹرمپ نے دعویٰ کیا کہ ایران فوری طور پر آبنائے ہرمز کھولنے کے لیے معاہدہ کرنا چاہتا ہے کیونکہ ایرانی فریق کو جنگ میں شدید نقصان اٹھانا پڑ رہا ہے۔ تاہم امریکی صدر نے کہا کہ ایران کی پیشکش امریکا کے لیے قابلِ قبول نہیں ہے۔

آبنائے ہرمز پر امریکی کنٹرول کا دعویٰ

ڈونلڈ ٹرمپ نے کہا کہ امریکا کو آبنائے ہرمز پر پہلے ہی مکمل کنٹرول حاصل ہے اور اس آبی گزرگاہ سے بڑی مقدار میں تیل کی ترسیل جاری ہے۔

انہوں نے مزید کہا کہ ایران معاہدہ کرنا چاہتا ہے اور امریکا بھی معاہدے میں دلچسپی رکھتا ہے، تاہم کسی بھی معاہدے کے لیے ایران کی موجودہ پیشکش کافی نہیں۔

ایران کی سات روزہ جنگ بندی کی تجویز

اس سے قبل ایرانی وزیر خارجہ عباس عراقچی نے کہا تھا کہ ایران نے قطر کے ذریعے امریکا کو سات روزہ جنگ بندی کا منصوبہ پیش کیا ہے۔

ایرانی مؤقف کے مطابق اگر امریکا اس تجویز سے اتفاق کرتا ہے تو سات روزہ جنگ بندی کے دوران آبنائے ہرمز کو دوبارہ تجارتی جہاز رانی کے لیے کھولا جا سکتا ہے۔

ایران اور امریکا کے درمیان جاری کشیدگی کے تناظر میں آبنائے ہرمز کی صورتحال عالمی توانائی کی منڈی اور بین الاقوامی بحری تجارت کے لیے اہمیت رکھتی ہے۔