اقوام متحدہ میں شہباز شریف کا خطاب، فلسطینی مشن نے اہم اقتباسات سوشل میڈیا پر نمایاں کردیے

وزیراعظم شہباز شریف کے اقوام متحدہ کی جنرل اسمبلی سے خطاب میں فلسطین سے متعلق دیے گئے بیانات کو فلسطینی مشن نے اپنے سوشل میڈیا پلیٹ فارمز پر نمایاں کیا ہے۔ فلسطینی مشن نے وزیراعظم کے خطاب کے ان حصوں کو شیئر کیا جن میں غزہ میں فلسطینی بچوں اور شہریوں کی صورتحال کا ذکر کیا گیا تھا۔

شہباز شریف نے اپنے خطاب میں فلسطینی بچی ہند رجب کا ذکر کرتے ہوئے کہا کہ گزشتہ سال انہوں نے جنرل اسمبلی میں اس کی دل دہلا دینے والی داستان بیان کی تھی۔ وزیراعظم نے اس سال 8 سالہ وفا عقیلہ کا حوالہ دیتے ہوئے کہا کہ اس کا اسکول کا پہلا دن اس کی زندگی کا آخری دن بن گیا۔

وزیراعظم نے سوال اٹھایا کہ غزہ میں پیدا ہونے والا بچہ بھی دنیا کے دیگر بچوں کی طرح زندگی، مستقبل اور خواب دیکھنے کا حق نہیں رکھتا؟ انہوں نے ہند رجب، وفا عقیلہ اور دیگر متاثرین کے واقعات کو عالمی برادری کی اجتماعی خاموشی اور عدم اقدام کے تناظر میں پیش کیا۔

شہباز شریف نے جنرل اسمبلی سے خطاب میں فلسطینی ریاست کے قیام کے لیے پاکستان کے مؤقف کا بھی اعادہ کیا اور کہا کہ فلسطینی عوام کے حقِ خودارادیت اور ریاست کے حق کی حمایت پاکستان کی پالیسی کا حصہ ہے۔