مری میں سکول وین حادثے کا شکار، 10 بچے جھلس کر زخمی

مری: لوئر موہڑا بڑا ہوتر کے قریب سکول کے بچوں کو لے جانے والی وین حادثے کا شکار ہوگئی، جس کے نتیجے میں 10 بچے جھلس کر زخمی ہوگئے۔

ریسکیو حکام کے مطابق سکول وین بے قابو ہو کر سڑک سے نیچے جا گری، جس کے بعد گاڑی میں اچانک آگ بھڑک اٹھی۔ حادثے کی اطلاع ملتے ہی ریسکیو 1122 کی قریبی ایمرجنسی ٹیمیں فوری طور پر جائے وقوعہ پر پہنچ گئیں۔

ریسکیو اہلکاروں نے بروقت کارروائی کرتے ہوئے وین میں سوار بچوں کو بحفاظت باہر نکالا اور زخمی بچوں کو موقع پر ابتدائی طبی امداد فراہم کی۔

ریسکیو حکام کے مطابق تمام زخمی بچوں کو مزید طبی امداد کے لیے سول ہسپتال مری منتقل کر دیا گیا ہے۔

دوسری جانب ریسکیو 1122 کی فائر فائٹنگ ٹیم نے وین میں لگی آگ پر قابو پا لیا، جبکہ جائے وقوعہ پر کولنگ کا عمل بھی مکمل کر لیا گیا۔