وزیراعظم شہباز شریف کی استنبول میں ترک سرمایہ کاروں سے ملاقاتیں، پاکستان میں سرمایہ کاری بڑھانے کی دعوت

وزیراعظم شہباز شریف نے ترکیہ کے شہر استنبول میں معروف ترک کاروباری گروپوں اور صنعتی تنظیموں کے سربراہان سے الگ الگ ملاقاتیں کیں، جن میں پاکستان اور ترکیہ کے درمیان اقتصادی تعاون، تجارت اور سرمایہ کاری کے فروغ پر تفصیلی تبادلہ خیال کیا گیا۔

ملاقاتوں کے دوران وزیراعظم نے کہا کہ پاکستان کی معیشت استحکام کی جانب گامزن ہے اور حکومت سرمایہ کاروں کے لیے سازگار اور کاروبار دوست ماحول فراہم کرنے کے لیے مؤثر اقدامات کر رہی ہے۔

انہوں نے ترک کمپنیوں کو توانائی، کان کنی، انفراسٹرکچر، بحری امور، لاجسٹکس، انفارمیشن ٹیکنالوجی، ٹیلی کمیونیکیشن، زراعت اور نجکاری سمیت مختلف شعبوں میں سرمایہ کاری بڑھانے کی دعوت دی۔ وزیراعظم نے اس موقع پر خصوصی سرمایہ کاری سہولت کونسل (SIFC) کے تحت فراہم کی جانے والی ون ونڈو سہولت سے بھی ترک سرمایہ کاروں کو آگاہ کیا۔

ترک کاروباری رہنماؤں نے پاکستان میں جاری اقتصادی اصلاحات اور بہتر ہوتے سرمایہ کاری کے ماحول کو سراہتے ہوئے حکومت کی معاشی پالیسیوں پر اعتماد کا اظہار کیا۔ انہوں نے مختلف اسٹریٹجک شعبوں میں سرمایہ کاری بڑھانے اور پاکستان کے ساتھ طویل المدتی کاروباری شراکت داری کے عزم کا اعادہ بھی کیا۔

ملاقاتوں میں دونوں ممالک کے درمیان اقتصادی تعلقات کو مزید وسعت دینے اور باہمی سرمایہ کاری کے نئے مواقع سے فائدہ اٹھانے پر اتفاق کیا گیا۔