وزیراعظم کی اپوزیشن کو پھر مذاکرات کی دعوت، میثاقِ جمہوریت اور میثاقِ معیشت پر اتفاقِ رائے کی اپیل

(اسلام آباد)وزیراعظم محمد شہباز شریف نے قومی اسمبلی میں بجٹ اجلاس سے خطاب کرتے ہوئے اپوزیشن جماعتوں کو ایک بار پھر مذاکرات کی دعوت دیتے ہوئے کہا ہے کہ ملک کو درپیش چیلنجز سے نمٹنے اور قومی استحکام کے لیے میثاقِ جمہوریت اور میثاقِ معیشت پر اتفاقِ رائے ناگزیر ہے۔

اپنے خطاب میں وزیراعظم نے کہا کہ تمام منتخب اراکینِ اسمبلی قابلِ احترام ہیں اور ایوان میں چاروں صوبوں کے نمائندے موجود ہیں، جن کے اپنے اپنے نظریات اور سیاسی مؤقف ہیں۔ انہوں نے کہا کہ حکومت کی جانب سے کئی بار اپوزیشن کو مذاکرات کی پیشکش کی جا چکی ہے اور آج بھی وہ اس مقصد کے لیے آگے بڑھنے کو تیار ہیں۔

شہباز شریف نے کہا، "اپوزیشن اراکین ہمارے بھائی ہیں، ان سے ہماری کوئی ذاتی لڑائی نہیں۔ آئیں مل بیٹھ کر میثاقِ جمہوریت اور میثاقِ معیشت کی طرف بڑھیں، ابھی بھی دیر نہیں ہوئی۔"

انہوں نے اپوزیشن رہنما محمود خان اچکزئی کی تقریر کا حوالہ دیتے ہوئے کہا کہ انہوں نے اسے توجہ سے سنا ہے، تاہم اس کا تفصیلی جواب وہ مناسب وقت پر دیں گے۔

وزیراعظم نے وفاقی اکائیوں کے حقوق پر بات کرتے ہوئے کہا کہ صوبوں کو معاشی وسائل کی منصفانہ تقسیم ان کا آئینی حق ہے۔ ان کے مطابق بلوچستان ملک کا ایک خوبصورت اور اہم صوبہ ہے، جہاں غیور اور محب وطن عوام آباد ہیں۔ انہوں نے بتایا کہ این ایف سی ایوارڈ میں بلوچستان کا حصہ 100 فیصد بڑھایا گیا، جس میں تمام صوبوں نے اپنا کردار ادا کیا جبکہ سب سے زیادہ حصہ پنجاب نے دیا۔

انہوں نے مزید کہا کہ بلوچستان کے کسانوں کو اربوں روپے مالیت کے سولر پینلز فراہم کیے گئے ہیں اور حکومت ملک کے تمام صوبوں کی یکساں ترقی اور خوشحالی کو اپنی ذمہ داری سمجھتی ہے۔ ان کا کہنا تھا کہ برابری اور انصاف کے بغیر نہ گھر چل سکتا ہے اور نہ ہی ریاست مضبوط ہو سکتی ہے۔

وزیراعظم نے ملک میں دہشت گردی کی صورتحال پر تشویش کا اظہار کرتے ہوئے کہا کہ بلوچستان اور خیبرپختونخوا میں دہشت گردی کے واقعات میں اضافہ دیکھنے میں آ رہا ہے اور دہشت گرد عناصر کو بیرونی معاونت حاصل ہے۔ انہوں نے کہا کہ سب جانتے ہیں کہ دہشت گردی کے پیچھے کس کا ہاتھ ہے اور سکیورٹی فورسز اس خطرے کا بہادری سے مقابلہ کر رہی ہیں۔

انہوں نے حالیہ ہیلی کاپٹر حادثے میں شہید ہونے والے افواجِ پاکستان کے افسران اور جوانوں کو خراجِ عقیدت پیش کرتے ہوئے کہا کہ شہدا کی قربانیاں قوم کے لیے ناقابلِ فراموش ہیں۔ ان کے بقول، "شہدا اپنی جانوں کا نذرانہ دے کر قوم کے کروڑوں بچوں کو یتیم ہونے سے بچاتے ہیں، ہمیں ان کی قربانیوں کا احترام کرنا ہوگا۔"

وزیراعظم نے اس عزم کا اعادہ کیا کہ حکومت دہشت گردی کے مکمل خاتمے، قومی یکجہتی کے فروغ اور تمام صوبوں کی مساوی ترقی کے لیے اپنی کوششیں جاری رکھے گی۔